Búgin jalǵasyn tapqan forýmnyń 5-shi paneldik sessııasynda «Qazaq gazetteri» JShS Bas dırektorynyń orynbasary Ásker Pırıev, «Qazcontent» AO Basqarýshy dırektory Ulan Ábishev, «ZAŃ» Medıa-korporasııasy» JShS Bas dırektory Dosymbek О́teǵalıev sondaı-aq medıa jáne saıası strategııalyq kommýnıkasııa mamany Jaınagúl Tólemis elimizdiń basqa óńirlerinen jınalǵan BAQ ókilderine trenıng ótkizip, tájirıbelerimen bólisti.
Alǵash bolyp sóz alǵan Ásker Pırıev jaqynda ǵana qaıta qurylǵan «Qazaq gazetteri» JShS quramyna «Egemen Qazaqstan» jáne «Kazahstanskaıa pravda» gazetteri qosylǵanyn eske sala ketti.
- «Qazaq gazetteri» quramynda 5 gazet pen 5 jýrnal bar. Búginde olarǵa «Egemen Qazaqstan» men «Kazahstanskaıa pravda» gazetteri de qosyldy. 12 basylymdy bir shańyraq astyna jınap otyrǵan seriktestikti úlken medıaholdıng dep atasaq ta artyq bolmas. Sebebi ár gazet-jýrnaldyń óz aldyna qoıǵan maqsat-mindetteri, mıssııasy bar. Bıyl Aqparat jáne qoǵamdyq damý mınıstrliginiń uıymdastyrýymen ótip jatqan óńirlik BAQ forýmyna «Qazaq gazetteri» Bas dırektorynyń orynbasary retinde alǵash qatysyp otyrǵanym da men úshin úlken mártebe», - dep atap ótti Ásker Pırıev.
Ol sondaı-aq zamanaýı medıa keńistigindegi menedjment salasynda kezdesetin máselelerge toqtala ketti.
«Medıa-menedjment salasynda buryn bolǵan máseleler búgin de, erteń de ózekti bolyp qala bermek. Biz qalasaq ta, qalamasaq ta kúndelikti ómirimizde paıda bolyp jatqan jańashyldyqtar álemdik tendensııaǵa aınalyp jatyr, mass-medıa ókilderi bul jańashyldyqtardan qur qalmaı, olarǵa árdaıym ilesip otyrýy qajet. О́mirimizde ǵalamtor men uıaly telefon paıda bolǵannan keıin aqparat aǵyny da jyldamdady. Buryn jýrnalıst bir oqıǵa oryn alatynyn bilip, sol oqıǵa ornyna baryp, aqparatyn jazyp, sýretin túsirip. redaksııaǵa daıyndap beretin. Keı jerlerde jumystyń mundaı shemasy qazir de saqtalsa da, búgingi 21-shi ǵasyrda bul tıimsiz ekenin moıyndaý qajet. Sebebi qazir aqparat adamnan da jyldam. Sol úshin jýrnalısterdiń, jalpy merzimdi baspasózdiń jumysyn úılestirip otyratyn mamandar - medıa-menedjerler. Taǵy bir másele - qoǵamda gazet oqý mádenıetin qalyptastyrý. Oqyǵan adam men oqymaǵan adam eshqashan birdeı bolmaıdy. Oqyǵan adam qoǵamdy basqarady, al oqymaǵan adam tutynýshy bolyp qala beredi. Keleshekte básekege qabiletti mamandardy daıyndaǵymyz kelse, birinshiden gazet oqý mádenıetin jańǵyrtýymyz qajet», dep atap ótti spıker.
Sonymen qatar, forým aıasynda «Qazcontent» AO Basqarýshy dırektory Ulan Ábishev baspa basylymdarynyń kontentin áleýmettik jelilerde nasıhattaý, taratý ádisteri men tásilderi jaıynda aıtty. Onyń aıtýynsha, qazirgi ýaqytta halyqtyń basym bóligi áleýmettik jeliniń belsendi qoldanýshylaryna aınaldy, sol sebepti áleýjeli - aqparatty kópshilikke taratýdyń tıimdi quraly.
