Aımaqtar • 27 Qańtar, 2023

Avtojol qurylysynyń qarqyny

Elimizdiń batys óńirinde Aqtóbe – Qandyaǵash – Maqat jol ýchaskesin jóndeý jumystary jalǵasyp jatyr. Qandyaǵash – Maqat ýchaskesinde negizgi jumystar aıaqtalyp, bıyl atalǵan baǵytta jol qozǵalysy ashylady dep josparlanǵan. Sonymen qatar uzyndyǵy 96 shaqyrym bolatyn Aqtóbe – Qandyaǵash ýchaskesinde de qyzý jumys júrip jatyr.

Abaı AIMAǴAMBET

Bul týraly Indýstrııa jáne ınfraqurylymdyq damý mınıstrliginiń keńeıtilgen alqa otyrysynda vıse-mınıstr Almaz Ydyrysov aıtyp berdi. Onyń málimetinshe, Atyraý – Astrahan ýchaskesiniń 277 shaqyrymynyń 140 shaqyrymynda kólik qozǵalysy qamtamasyz etilgen. Aıta keteıik, Batys Qazaqstan oblysynda 248 shaqyrymdaı jolǵa kúrdeli jóndeý júrgizilip, onyń 129 shaqyrymynda jol júrisi qamtamasyz etilipti. «Qazir tıisti jumystardy ýaqtyly aıaqtaý úshin qajetti materıaldar daıyndalyp jatyr. Aqpan aıynan bastap ınertti materıaldardy tasymaldaýǵa arnalǵan vagondar parkin ulǵaıtýdy josparlap otyrmyz», dedi vıse-mınıstr.

Budan bólek vıse-mınıstr byltyr avtojol jobalarynyń sapasyn arttyrý maqsatynda zańnamalyq deńgeıde birqatar túzetý qabyldanǵanyn atap ótti. Mysaly, kepildik merzimi kezeńinde avtorlyq qadaǵalaý men tehnıkalyq baqylaýdyń jaýapkershiligi ortaq bolady. О́z kezeginde Jol aktıvteriniń ulttyq sapa ortalyǵy eldi mekenderdegi kóshelerde júrgizilgen ortasha jóndeýge vedomstvolyq saraptamany jasaıdy.

Jalpy, bıyl elimizdegi avtomobıl joldarynyń qurylys jáne jańǵyrtý jumystarymen qamtylýy 10,5 myń shaqyrymǵa deıin jetpek. A.Ydyrysovtyń aıtýynsha, osy jyly respýblıkalyq joldardyń jelisi boıynsha 7,3 myń shaqyrymǵa, sondaı-aq jergilikti jelide 3,2 myń shaqyrym joldy salyp, jańǵyrtý josparlanyp otyr.

Aıta ketý kerek, qazir elimizdiń shyǵys óńirinde Taldyqorǵan – О́skemen, Qalbataý – Maıqapshaǵaı, Úsharal – Dostyq syndy iri avtojol jobalary júzege asyrylyp jatyr. 2023 jyly 180 shaqyrymǵa jetetin Úsharal – Dostyq ýchaskesinde tıisti jumystardy tolyq aıaqtaý kózdelgen. Qalǵan ýchaskeler boıynsha jańa jabyn arqyly jol qozǵalysyn ashý 2024 jylǵa mejelenip otyr.

Vıse-mınıstr Qyzylorda – Jezqazǵan ýchaskesindegi qurylys týraly aıta kele, bıyl Ulytaý oblysyndaǵy jol ýchaskesinde tıisti jumystar bastalatynyn atap ótti. Jezqazǵan – Qaraǵandy jobasy boıynsha da qurylys jumystary bastalatyny belgili boldy.

Memleket basshysynyń tapsyrmasyna sáıkes, byltyrǵy jeltoqsan aıynda mınıstrlik elimizdiń kólik-logıstıkalyq áleýetin damytýdyń 2030 jylǵa deıingi tujyrymdamasyn bekitken edi. Tujyrymdama – salany odan ári damytyp, aldaǵy is-qımyldy aıqyndaıtyn negizgi qujat. Elimizdiń tranzıttik áleýetin arttyrý úshin byltyr temirjol salasyndaǵy iri ınfraqurylymdyq jobalar júzege asyryla bastaǵanyn aıta ketken oryndy. Solardyń ishinde súıektisi dep 2022 jyldyń qarasha aıynda ekinshi torabynyń qurylysy bastalǵan, temirjol kóligi salasyndaǵy iri jobalardyń biri – Dostyq-Moıynty temirjol ýchaskesin aıtýǵa bolady.