Lısenzııasyz jumys istegen 56 bilim oshaǵynyń 40-y – memlekettik, 16-y – jekemenshik mekeme. Bul mektepterdiń eń kóbi Astana jáne Almaty qalalarynda, Atyraý, Almaty, Batys Qazaqstan, Túrkistan, Jetisý, Mańǵystaý jáne Jambyl oblystarynda ornalasqan.
Búgingi tańda 11 mektep bilim berý qyzmetine lısenzııa aldy. Úsh mekteptiń materıaly – sottyń qaraýynda. 42 mektepke qatysty sot lısenzııasyz qyzmet kórsetkeni úshin aıyppul taǵaıyndaý týraly qaýly shyǵardy.
«Zańnamaǵa sáıkes, barlyq mektep bilim berý qyzmetin bastamas buryn ruqsat alýy kerek. Mektepke bilim berýmen aınalysý quqyǵy lısenzııa alǵan sátten bastap qana beriledi. Lısenzııanyń joqtyǵy mekteptiń jaramdylyq tekserýinen ótpegenin nemese ruqsat alý úshin qujattardy tapsyrmaǵanyn bildiredi. Lısenzııasyz mektepter bilim týraly memlekettik úlgidegi qujattardy, ıaǵnı negizgi jáne jalpy orta bilim týraly attestattardy bere almaıdy. Lısenzııasyz jumys isteıtin mektepterge qatysty mınıstrliktiń aýmaqtyq departamentteri ákimshilik is qozǵady. Búginde sot sheshimimen 42 mektepke lısenzııasyz bilim berý qyzmetin júrgizgeni úshin aıyppul salyndy. Eger mektep zańdy tulǵa retinde memlekettik tirkelgen sátten bastap alty aı ishinde lısenzııa almasa, onda ol sot tártibimen jumysyn toqtatady», dedi Oqý-aǵartý mınıstrligi Bilim salasynda sapany qamtamasyz etý komıtetiniń tóraǵasy Ernur Daýenov.
Jalpy, mektepter – jergilikti atqarýshy organdardyń quzyretinde. Bul rette mınıstrlik oblystardyń, respýblıkalyq mańyzy bar qalalardyń ákimdikterine jáne bilim basqarmalarynyń basshylaryna mektepterdegi quqyq buzýshylyqtardy joıý úshin sharalar qabyldaý týraly resmı hat joldady.
