Eńbek • 01 Aqpan, 2023

О́ndiristik jaraqat azaımaı tur

О́ndiris oryndarynda qaýipsizdikti saqtaý qansha jerden barynsha qadaǵalanǵanymen, muny qunttamaı, opyq jep qalatyn oqys oqıǵalardyń sany azaıar emes. О́tken jyly óndiristegi jazataıym jaǵdaılardan 1 465 jumysker zardap shekti, onyń 203-i qaza tapty. Bul soraqy kórsetkish aldyńǵy jylǵa qaraǵanda jaqsarǵan joq, ıaǵnı óndiristik jaraqat sany 2021 jyldyń deńgeıinde saqtaldy.

Orynbek О́TEMURAT

Eńbek jáne halyqty áleýmettik qorǵaý mınıstrliginiń málimeti boıynsha, 2022 jyly óndiristik jaraqattaný koeffısıenti (1000 jumyskerge shaqqandaǵy jazataıym oqıǵalardyń jıiligi) 0,22-ny qurady. Respýblıkanyń óndiristik aımaqtarynda jaraqat alýdyń eń joǵary deńgeıi saqtalyp tur. Máselen, Qaraǵandy oblysynda – 180 adam, ShQO-da – 169 adam, Qostanaı oblysynda – 142 adam, Pavlodar oblysynda – 112 adam, Aqtóbe oblysynda – 103 adam, Almaty qalasynda 114 adam jumys ornynda keleńsiz jaǵdaıǵa tap bolyp, zardap shekti. Al ekonomıkanyń salalary boıynsha eń kóp zardap shekkender taý-ken metallýrgııa kesheniniń ónerkásipterinde (16,2%) jáne qurylys salasynda (15%) tirkeldi.

Jazataıym oqıǵalardyń negizgi sebepterine kelsek, mundaı oqys jaǵdaıdyń 33,9%-y jábirlenýshiniń óziniń óreskel abaısyzdyǵynan, 29%-y óndiristegi jumystyń tıisti deńgeıde uıymdastyrylmaýynan, 9,4%-y jol qozǵalysy erejelerin buzýdan jáne qaýipsizdik jáne eńbekti qorǵaý erejelerin saqtamaýdan oryn alady eken.

Qaýipsiz eńbek jaǵdaıyn jasaý men óndiristik jaraqattanýdy azaıtý – Úkimettiń negizgi mindetteriniń biri. Sondyqtan máseleniń órshýine jol bermeýge basa mán berilý kerek. Keıingi bes jyldyń ishinde memlekettik organdar men jumys berýshilerdiń eńbekti qorǵaý salasy boıynsha qabyldaǵan keshendi sharalarynyń nátıjesinde óndiristik jaraqattaný deńgeıi 6,5%-ǵa tústi. Saqtandyrý men ereje buzýdyń aldyn alý maqsatynda 2 800 kásiporyn qaýipsizdik pen eńbekti qorǵaý standarttaryn engizdi.

Sonymen qatar Kásipodaqtar federasııasymen birlesip, múgedektigi bar adamdardy halyqtyq baqylaýshy retinde tartýdy kózdeıtin «Halyqtyq baqylaý» áleýmettik mańyzdy jobasy engizilip jatyr. Búginde jobany júzege asyrýǵa respýblıkanyń 240 kásiporny qosylyp, onda 600-den asa jumysker ishki baqylaýdy oryndap otyr.

Buǵan qosa 2019 jyldan bastap Eńbek jáne halyqty áleýmettik qorǵaý mınıstrligi tarapynan «Nóldik jaraqat – Vision Zero» tujyrymdamasyn jetildirý boıynsha belsendi jumys atqarylyp jatyr. Oǵan búginde 332 kásiporyn qosyldy.

Sondaı-aq «Onlaın eńbek konsýltanty» elektrondy servısi iske qosyldy. Bul jumysker men jumys berýshiniń arasynda qashyqtyqtan ózara árekettesýdi qamtamasyz etý úshin eńbek zańnamasynyń saqtalýynyń tıimdiligin arttyrýǵa múmkindik beredi. Servıste jumys berýshiniń eńbekti qorǵaý talaptaryn saqtaýy boıynsha tekserýden ótýin qarastyrady. Bul servıs iske qosylǵaly beri 13 854 jumys berýshi paıdalandy.