Ikemdi baǵam rejimi

Ulttyq banktiń habarlaýynsha, bir aı ishinde valıýta naryǵy suranys pen usynys turǵysynan teńgerimdi boldy, aıyrbastaý baǵamy na­ryq­tyq jaǵdaılarǵa baılanysty qalyptasty.

«Kvazımemlekettik sektor sýbektileriniń valıýta­lyq túsimdi satýy ótken aıda shamamen 453 mln dollardy qurady. Kvazımemlekettik sektor kompanııalary ekinshi deńgeıli bankter arqyly valıýta naryǵynda satýdy óz aldyna derbes júrgizdi. Ulttyq qordan respýblıkalyq bıýd­jetke transfertterdi qam­tamasyz etý úshin valıýta satý qańtarda 228 mln dollar boldy. Ulttyq qordan satý úle­si saýda-sattyqtyń jalpy kóleminen 11,1 paıyz boldy jáne bir kúnde 12 mln dollardan aspady. Ulttyq qor­dyń qarajatymen operasııalar júrgizý kezinde Ulttyq bank naryqtyq beıtaraptyq qaǵıdatyn saqtaıdy. Bul shetel valıýtasyn turaqty ári birkelki satý degendi bildi­redi. Mundaı tájirıbe valıý­ta naryǵyna Ulttyq qor ope­rasııalarynyń áserin baryn­sha azaıtýǵa múmkindik bere­di», delingen habarlamada.

BJZQ zeınetaqy aktıv­teri­niń valıýtalyq úlesin 30 paıyz deńgeıinde ustap turý maq­satynda Ulttyq bank qań­tarda bırjalyq saýda-sat­tyqta shetel valıýtasyn satyp alýdy júzege asyrǵan. Onyń jalpy somasy 120 mln dollar nemese naryqtyń jalpy kóleminen shamamen 5,8 paıyzdy qurady.

Sondaı-aq qańtarda Ult­tyq bank valıýtalyq ıntervensııalar júrgizbegen. UB sarapshylarynyń aıtýynsha, qysqa merzimdi perspektıvada teńgeniń dınamıkasy geosaıası jaǵdaıdyń ózgerýine, ishki qatysýshylardyń kútýlerine jáne álemdik naryqtardaǵy jaǵdaıǵa baılanysty bolady. Ulttyq bank teńgerimsizdiktiń jınaqtalýyna jol ber­meı­tin jáne altyn-valıýta re­zervteriniń saqtalýyn qamta­ma­syz etetin ıkemdi baǵam belgileý rejimin ustanýdy jalǵastyrady.