«QazMunaıGaz» ulttyq kompanııasy aksıonerlik qoǵamy osy baǵyttaǵy oń ári tyń bastamany qolǵa aldy. Ulttyq kompanııa National Geographic Qazaqstan jýrnalymen birlesip, Qyzylorda, Aqtóbe jáne Mańǵystaý oblystarynyń 900-den asa mektebine qazaq tilindegi osy basylymdy tegin jazdyrý jobasyn bastady. Sonymen qatar mektepterge jýrnaldyń 2022 jylǵy muraǵatyn satyp alyp berdi.
Jýrnal týraly birer derek keltirsek, National Geographic – AQSh-tyń ulttyq geografııa qoǵamynyń resmı basylymy, 135 jyldan beri álemniń 80-nen asa elinde jaryq kórip keledi. Jer jahanda mıllıondaǵan oqyrmany bar, óz brendin qalyptastyrǵan. Onyń jýrnal, telearna, kitap, áleýmettik jelidegi jalpy aýdıtorııasy 900 mıllıonnan asady.
National Geographic jýrnalynyń muqabasyndaǵy túrli-tústi, boıaýy qanyq, tańǵajaıyp fotosýretteri birden kózge túsedi, tanymdyq maqalalary álemniń ár qıyryna jeteleıdi. Ásirese jaratylys syryn qazbalaıtyn, adamzat balasynyń órkenıetke jetý jolyndaǵy talpynystaryn tereń taldaıtyn materıaldardyń orny bólek.
Saıasattan tys jazbalar, tarıh pen qazirgi ýaqytty, tumsa tabıǵat pen ekologııa zardaptaryn zerdelegen, geografııa, arheologııa, tarıh, bıologııa, astronomııa jáne t. b. kóptegen ǵylym salasyn keńinen qamtyǵan maqalalar oqyrmanyna oı salady. Sapaly ári mazmundy jýrnal shyǵarý isine álemniń túkpir-túkpirinen úsh myńnan asa zertteýshi atsalysady. Olar – óz zertteý nysanyn tereń biletin, soǵan bar ýaqytyn, zeıinin, tipti ǵumyryn arnaǵan jandar. Atyna qarap basylym tek geografııa máselelerine basymdyq beredi dep oılaý – qate. Onda bıologııa, antropologııa, ǵarysh jáne medısına taqyryptary da keńinen qamtylady.
National Geographic Qazaqstan 2016 jyldyń aqpan aıynan beri qazaq tilinde jaryq kóredi. Bizdiń ana tilimizdi qosqanda álemge áıgili basylym 38 tilde shyǵyp keledi. Jýrnaldyń óz tilindegi nusqasyn shyǵarýdy burynǵy Keńes odaǵy elderinen Grýzııa, Ortalyq Azııa memleketteriniń arasynda Qazaqstan ǵana qolǵa alǵan, búginde qazaqshasynyń taralymy – 7 500 dana. Jarııalanǵan aıǵaqtar men jańalyqtar, zertteýler men kóz tartar kórinister, «Kúnniń úzdik sýretindegi» foto, saıahat pen tabıǵat týraly maqalalardan árkim óz keregin tabady.
Keshe Qyzylorda qalasynyń T.Esetov atyndaǵy №264 mektep-lıseıinde «QazMunaıGaz» UK AQ Basqarma tóraǵasy Maǵzum Myrzaǵalıev, Qyzylorda oblysy ákiminiń orynbasary Nurymbet Saqtaǵanov, National Geographic Qazaqstan bas redaktory Erkin Jaqypov, qala mektepterindegi geografııa páni muǵalimderi, mektep dırektorlarynyń ǵylymı-ádistemelik máseleler jónindegi orynbasarlary, orta jáne joǵary synyp oqýshylary qatysqan is-shara ótti.
Elimizde Memleket basshysynyń tapsyrmasymen «Oqýǵa qushtar mektep» jobasy iske asyp jatyr. Jobany qoldaý qadamyn «QazMunaıGaz» UK AQ Qyzylorda oblysynan bastady. Kompanııa Syr óńiriniń 300-den asa mektebine jýrnaldyń bir jyldyq tegin jazylymyn uıymdastyryp, mektep kitaphanalarynda ótken jylǵy jáne aldaǵy jaryq kóretin nómirlerdi oqýǵa múmkindik jasady.
M.Myrzaǵalıev National Geographic Qazaqstan jýrnalymen birlesken jobanyń ashylý saltanatynda bul Memleket basshysy Qasym-Jomart Toqaevtyń zııatker ult qalyptastyrý jónindegi tapsyrmasyna tolyq saı keletinin aıtty.
– Bul joldaǵy mańyzdy qadam jaratylystaný-ǵylymı, tehnıkalyq baǵyttaǵy jýrnaldardy oqý mádenıetin qaıta jandandyrý ekenine senimdimiz. Tańdaýdyń National Geographic jýrnalyna túskeni kezdeısoq emes. Redaksııanyń ekologııa máselelerine tıisti kóńil bólip, oqyrmannyń sana-sezimine áser etýge tyrysatyny óte mańyzdy. Qorshaǵan ortanyń qaýipsizdigi – bizdiń kompanııa úshin de mańyzdy qundylyqtardyń biri. Sonymen qatar biz úshin aýyl mektepteriniń jýrnalǵa jazylýyn uıymdastyrý asa mańyzdy. Aýyl men qala arasyndaǵy aqparattyq jáne bilim berýdegi teńsizdikti joıý memleket pen bıznes aldyndaǵy ortaq mindet dep sanaımyz. Bul joba «QazMunaıGazdyń» áleýmettik jaýapkershilik bóliginde korporatıvtik saıasatynyń bir bóligi ekenin aıta ketken jón, – dedi Basqarma tóraǵasy.
Kompanııa qyzmetkerleriniń eńbek jaǵdaıy men turmysyn jaqsartýǵa basa nazar aýdaratyny belgili. Oǵan qosa medısınalyq ortalyqtar, sport keshenderiniń qurylysyn qarjylandyrýda, daryndy jastarǵa dańǵyl jol ashýǵa negizdelgen iri jobalardy júzege asyryp keledi. Búgingideı bastama sıfrlyq tehnologııalar adamzattyń aqparat tutyný ádetterin túbegeıli ózgertken kezeńde jas urpaqtyń, ustazdardyń gazet-jýrnaldardy oqý mádenıetine qaıta oralýy úshin óte kerek.
– National Geographic Qazaqstan jýrnalynyń basshylyǵy men redaksııasyna yntymaqtastyq úshin, sondaı-aq onyń jaratylystaný ǵylymdaryn nasıhattaýǵa jáne memlekettik tildegi sapaly kontentti damytýǵa qosyp júrgen úlesi úshin alǵys aıtqym keledi. Al búgingi jıynnyń basty keıipkerleri – oqýshylarǵa paıdaly ilim men jarqyn jańalyqtar tileımin! Oqýda ozat bolyp, osyndaı jýrnaldardy kóp oqyp, úlgili tártip pen ózin ózi damytý arqyly osynda otyrǵan kópshiligińiz bolashaqta ǵalym-zertteýshi, saıahatshy men geolog, ekolog pen ınjener bola alatyndaryńyzǵa senimdimin, – dedi M.Myrzaǵalıev.
Saltanatty rásim kezinde Qyzylorda oblysy boıynsha jazylý sertıfıkaty jaratylystaný-ǵylymı pánder boıynsha olımpıadalardyń qatysýshysy ári júldegeri, №264 mekteptiń 9-synyp oqýshysy Sanjar Sultanbekke tabystaldy. Sonymen qatar qala mektepteriniń shákirtteri jetistikke jetken geografııa páni muǵalimderi Alǵys hatpen marapattaldy.
Jýrnaldyń bas redaktory Erkin Jaqypovtyń aıtýynsha, ustazdar men oqýshylar úshin qazaq tilindegi ǵylymı kontentke qoljetimdiliktiń mańyzy zor. Mekteptegi oqý baǵdarlamalarynyń taqyryptaryna qosymsha kómek bolatyn quraldar – árıne, ǵylymı jýrnaldar. Basylym álemniń 80 elindegi 3 myńdaı zertteýshiniń eńbegin oqyrmanyna usynyp keledi.
– Ustazdar qaýymy National Geographic Qazaqstan jýrnalyn geografııa, bıologııa, jaratylystaný pánderinde kúndelikti qosymsha qural retinde qyzyqty, tartymdy sabaq ótkizý úshin qoldana alady. Sondaı-aq oqýshylardyń fýnksıonaldyq saýattylyǵyn, zertteýshilik oı-qabiletin damytýǵa septigin tıgizedi. Ártúrli ǵylymı-tanymdyq jobalarǵa, jarystarǵa osy taqyryptardy arqaý etip alýyna bolady. Bul jas izdenýshilerdiń ǵylymǵa, zertteýge degen qulshynysyn oıatady, – dedi bas redaktor.
Ustazdar úshin mektep baǵdarlamasynan tys qosymsha ádebıetter men resýrstarǵa qoljetimdilik óte mańyzdy. Sondyqtan osy is-sharaǵa qatysqan geografııa páni muǵalimderiniń de pikirin bildik. №264 mekteptiń geografııa páni muǵalimi Sholpan Nurmahanovanyń aıtýynsha, oqýshylardy ǵylymı jobalar jazýǵa baýlý, olımpıadalarǵa daıyndaýǵa osyndaı sapaly materıaldar asa qajet. Bul talapkerdi izdenýge yntalandyrady, oı-tanymyn baıytady.
Is-shara sońynda National Geographic ókili jergilikti mektepterdiń muǵalimderine basylymnyń onlaın jáne offlaın resýrstaryn qoldaný boıynsha trenıng ótkizdi. Muǵalimder usynylyp otyrǵan mol materıaldy kúndelikti jumys barysynda paıdalanýǵa múmkindik týǵanyna rızashylyq bildirdi.
