Arshaly aýdanyna jańa ákim bekitildi

ASTANA. 18 maýsym. Aqmola oblysynyń ákimi Sergeı Kýlagınniń ókimimen jáne aýdandyq máslıhat depýtattary kelisiminiń kezekti sessııasynda Jomart Nurkenov Arshaly aýdanynyń ákimi bolyp taǵaıyndaldy. Bul týraly «QazAqparat» habarlady. Jomart Jumaǵalıuly 1974 jyly týǵan, Aqmola agrarlyq ýnıversıtetin jáne Sh. Ýálıhanov atyndaǵy Kókshetaý memlekettik ýnıversıtetin bitirgen. Eńbek jolyn 1996 jyly «Konstantınovskıı» óndiristik kooperatıviniń mal dárigeri bolyp bastady. 1998 jylǵy qarashadan beri Aýyl sharýashylyǵy mınıstrligi Selınograd aýdandyq aýmaqtyq basqarmasy veterınarlyq baqylaý bóliminiń meńgerýshisi, bas memlekettik veterınarlyq ınspektory, keıin basqarma bastyǵynyń orynbasary qyzmetterin atqardy. 2002 jylǵy sáýirde Aýyl sharýashylyǵy mınıstrligi Aqmola oblystyq aýmaqtyq basqarmasy veterınarlyq baqylaý bóliminiń bastyǵy laýazymyna aýysty. Aýyl sharýashylyǵy mınıstrligi Aqmola oblystyq aýmaqtyq basqarmasy bastyǵynyń orynbasary, bastyǵy laýazymdaryna kóterildi. 2012 jylǵy aqpan men 2013 jylǵy maýsym aralyǵynda Aqmola oblysy aýyl sharýashylyǵy basqarmasynyń bastyǵy qyzmetin atqardy. Al 2013 jylǵy maýsymnan bastap osy taǵaıyndaýǵa deıin Atbasar aýdanynyń ákimi boldy. Joldybaı Bazar. Derekkóz: «QazAqparat». Foto: «QazAqparat».