Bıyl atalǵan oblysta jıyntyq qýaty 23,5 MVt bolatyn taǵy 3 GES paıdalanýǵa beriledi. Qazir óńirde jańartylǵan energııa kózderiniń 14 nysany bar, olardyń jalpy qýaty – 160 MVt.
Sarqan aýdany ákimdiginiń málimetine qaraǵanda, Lepsi aýyldyq okrýgindegi jel elektr stansasynyń kezeń-kezeńimen júrgizilgen qurylys jumystary 2019 jyly bastalǵan edi. Ásirese nysannyń ornalasatyn jerine erekshe nazar aýdaryldy. Jazyq alqap - jeldiń jyldyq ortasha jyldamdyǵy úshin taptyrmas jer, sondyqtan onda jyl boıy elektr energııasyn óndirýge bolady. Nysannyń qurylys-montajdaý jumystary 2022 jyldyń qarasha aıynda tolyq aıaqtalǵan. Sol kezden bergi JES-te óndirilgen elektr qýaty 23,767 myń KVt/saǵatqa jetti.
Jalpy «ENEVERSE KUNKUAT» JShS iske asyrǵan joba aıasynda 16 jel qondyrǵysy ornatylǵan. Jel machtynyń bıiktigi - 100 metr, qalaqshasynyń kólemi – 70 metr. Árbir qurylǵy shamamen 3,2 MVt elektr energııasyn óndire alady. Jalpy qýaty – 50 MVt.
Atap ótsek, Sarqan aýdanynda «jasyl» energetıkany damytý baǵytynda aýqymdy jumystar júrgizilip jatyr. Aýdanda iske qosý josparlanǵan 5 sý elektr stansysynyń búgingi kúni 3-eýi tabysty jumys istep tur. Qalǵan 2-eýiniń qurylysy bıyl aıaqtalyp, iske qosylady. Atap aıtqanda, «Baskan Power» JShS-nyń jalpy qýaty - 14,9 Mvt bolatyn, quny 11,7 mlrd teńgelik, 24 jumys orny qurylatyn Joǵarǵy Basqan GES-2 jáne 3 jobasy. Oǵan qosa Kerbulaq aýdanynda qýaty 8,6 MVt, quny 6,3 teńgelik Kóktal GES-1 jobasy da bar.
Oblystyq energetıka jáne TÚKSh basqarmasynyń málimetine qaraǵanda, 2021-2025 jyldar aralyǵynda Jetisý oblysynda jalpy qýattylyǵy 236,7MVt bolatyn 13 jańartylǵan energııa kózi nysanyn iske qosý josparlanǵan. (GES – 10, JES – 2, KES – 1). Sonyń 3-eýi búgingi kúni paıdalanýǵa berilgen, taǵy úsheýi bıyl qoldanysqa beriledi, jalpy qýaty 132,5 MVt qalǵan 7 nysan 2025 jylǵa deıin iske qosylýy tıis.
Jalpy Jetisý oblysynyń ózinde óndiriletin elektr energııasynyń kólemi 479,2 mln kVt/saǵatty qurasa, ondaǵy jańartylǵan elektr energııasy kózderiniń úlesi 340,6 mln kVt/saǵat bolyp otyr.
