Eńbek jáne halyqty áleýmettik qorǵaý mınıstrliginiń habarlaýynsha, ulttyq joba aıasynda qonys aýdarýshylarǵa memlekettik qoldaý sharalary usynylady. Atap aıtqanda, bir mezgilde otaǵasyna jáne otbasynyń árbir múshesine 70 AEK mólsherinde kóshýge arnalǵan sýbsıdııa beriledi, sondaı-aq otbasy músheleriniń sanyna jáne eldi mekenge baılanysty 12 aı ishinde 15-ten 30 AEK-ke deıingi kólemde turǵyn úı jaldaýǵa jáne kommýnaldyq qyzmetterge aqy tóleýge aı saıynǵy sýbsıdııalaý, qysqa merzimdi kásiptik oqytýǵa jiberý jáne jumysqa ornalasýǵa nemese kásipkerlik bastamany damytýǵa járdemdesý sııaqty sharalar qarastyrylǵan.
2022 jyly qonys aýdarǵandardyń ishinde 3 652 adam eńbekke jaramdy, olardyń 2 811-i turaqty jumysqa ornalastyrylǵan. Birjolǵy sýbsıdııalar 7 622 qatysýshyǵa tólendi, al 5 633 azamatqa turǵyn úı shyǵystary sýbsıdııalanady.
Buǵan qosa óńiraralyq qonys aýdarýǵa járdem kórsetetin jumys berýshilerge turǵyn úımen qamtamasyz etilgen jáne keminde 2 jyl merzimge turaqty jumysqa qabyldanǵan árbir jumysker úshin 400 AEK mólsherinde jumysqa ornalasýǵa birjolǵy sýbsıdııa beriledi.
Jumys kúshi jetispeıtin óńirlerge qonys aýdarý múmkindigin paıdalanǵan mundaı azamattardyń kóbiniń ómirinde oń ózgerister baıqalady. Buryn jumyssyz júrgen jurt basqa óńirde eńbekke aralasyp, nápaqasyn taýyp júr. Solardyń biri – Nurbolat Mádıev. Ol Qyzylordadan Qostanaı oblysyna kóshipti.
«2019 jyly men bolashaq jarymmen birge Áýlıekól aýdanyna kóship keldim. Qazir aýdandyq aýrýhanada massajıst bolyp jumys isteımin. Jumyspen qamtý ortalyǵy arqyly jumysqa ornalastym. Maǵan barlyq qoldaý sharalary kórsetildi. Bul úshin rızashylyǵymdy bildiremin. Mundaı baǵdarlamalar kóp bolsa, jaqsy bolar edi», deıdi ol.
N.Mádıev jubaıymen osynda kóship kelgennen keıin úılendi. Onyń jubaıy aýdandyq aýrýhanaǵa gınekolog bolyp jumysqa ornalasty. Jas otbasy qazir ekinshi sábıin kútip otyr eken.
Kóshi-qon komıteti tóraǵasynyń mindetin atqarýshy Ilııas Ispanovtyń aıtýynsha, qandastar men qonys aýdarýshylardy qabyldaýdyń 2023 jylǵa arnalǵan óńirlik kvotasy 8 652 adamdy quraıdy. Onyń 1,9 myńy qandastar úshin, al 6,7 myńy qonys aýdarýshylar úshin kózdelgen.
«Qazirgi ýaqytta mınıstrlik 2023-2027 jyldarǵa arnalǵan Kóshi-qon saıasatynyń tujyrymdamasyn qabyldady. Bul qujat jumys oryndary qurylatyn jáne qoldanystaǵy bıznes-jobalar keńeıtiletin soltústik jáne ortalyq óńirlerge ishki qonys aýdarý tetigin qaıta qaraıdy. Buǵan qosa turaqty jumysqa ornalasqan azamattarǵa jańa turǵylyqty jeri boıynsha 4 mln teńgege deıingi mólsherde turǵyn úı satyp alýǵa qarjylaı kómek alýǵa múmkindik beretin utqyrlyq sertıfıkattaryn engizý múmkindigi qarastyrylyp jatyr. Iske asyrylyp jatqan sharalar halyqty qonystandyrýdyń óńirishilik dısproporsııasy máselelerin retteýde sheshýshi ról atqarady», deıdi I.Ispanov.
