Otandyq kásiporyndar qabileti artty

Soltústik Kaspıı jobasynyń operatory – «Nort Kaspıan Opereıtıng Kompanı B.V.» (NKOK) NKPOK agent­tik kompanııasymen birge jergilikti kásiporyndardyń básekege qabilettiligin arttyý maqsatynda halyqaralyq standarttar boıynsha oqytý men sertıfıkattaýdy uıymdastyrady. Taıaýda  konsorsıýmnyń jergilikti kompanııalardy damytý mindettemeleriniń sheńberinde 14 jergilikti kompanııaǵa halyqaralyq sertıfıkattar tabystady. Jergilikti qamtý jónindegi menedjer Aınur  Netalıevanyń pikirinshe, Soltústik Kaspıı jobasynyń sheńbe­rinde konsorsıým jergilikti qamtýdy da­mytýǵa aıtarlyq úles qosyp keledi.  Buǵan dálel retinde 2006 jyldan beri jergilikti taýarlarǵa, jumystar men qyzmetterge 10 mıllıard AQSh dollarynan astam qarjy jumsalǵanyn aıtýǵa bolady. «Biz jergilikti kompanııalardyń qyzmetteri men jumystary halyqaralyq standart talaptaryna sáıkes kelýin qamtamasyz etý úshin olarǵa yqpaldy kómek kórsetemiz. Sonymen birge,  ISO standarttary beretin qosymsha múmkindiktermen tanystyramyz. Olar operator men agent kompanııalardyń Soltústik Kaspıı jobasy boıynsha kelisimshart berý tenderlerine qatysyp qana qoımaı, elimizde de, shetelderde de óz tıimdiligi men básekege qabilettiligin arttyra alady.  2006-2013 jyldar aralyǵynda konsorsıým 77 jergilikti kompanııaǵa halyqaralyq standarttar boıynsha oqý men sertıfıkattaýdy uıymdastyryp, olardy ótkizýge qarjylaı kómek berdi. Endi, mine, taǵy da birneshe kompanııa solardyń qataryna qosylatyny óte qýanyshty jaıt», deıdi A.Netalıeva. NKOK kompanııasy jergilikti kom­pa­nııalardyń múmkindikterin artty­rýǵa múddeli ekendigin «Soltústik Kaspıı jobasynyń qoldaýymen kompanııa múldem jańa deńgeıge jetip, seriktesterimizdiń senimin arttyrdyq» degen «Jigermunaıservıs» qazaqstandyq kompanııasynyń basshylyǵy da qýattaı­dy. ISO-9001, ISO-14001, ISO-22000 jáne OHSAS-18001 sertıfıkattary  KazNIPIITES «Energııa» AQ, «Ýral­energostroı», «Jigermunaıservıs», «Arhat», «CTCS Logistics», «Fırma «Fıal», «Tesla-Tan», «Adem Ecology», «Nasar Solutions» JShS, «Grın-Atyraý», «Azııaprom», «Nııaz-Mohammed»,  «Jaıyq-Iýnıversal» seriktestikteri men «Isker» konsorsıýmyna berildi. Joldasbek ShО́PEǴUL, «Egemen Qazaqstan». Atyraý oblysy.