Sý tasqynyń aldyn alýǵa qatysty ózekti máseleler «Amanat»-tyń partııalyq baqylaý komıtetiniń kezekti otyrysynda talqylandy. Komıtet tóraǵasy Artýr Platonov elimizdegi 255 eldi meken sý basý qaýpi bar aımaqtarda qalyp otyrǵanyn jáne onda 127 myńnan astam turǵyn úı men 700 myńnan astam adam bar ekenin atap ótti. Tótenshe jaǵdaılar mınıstrliginiń málimetinshe, elimizde apattyq jaǵdaıdaǵy 5 jáne jóndeýdi qajet etetin 73 sý qoımasy, qorǵanys bógenderi, platına men toǵandar bar. Olar aıaq astynan isten shyǵatyn bolsa, jergilikti turǵyndarǵa úlken qaýip tónedi.
Sondaı-aq jıynda byltyr 2021-2023 jyldarǵa josparlanǵan Jol kartasy boıynsha sý tasqynyna qarsy atqarylýǵa tıisti 68 is-sharanyń 41-i oryndalmaǵany belgili boldy.
«Elimizdegi 400-den astam gıdrotehnıkalyq qurylysty jóndeý qajet. Solaı bola tura, kommýnaldyq jáne jekemenshiktegi mundaı qurylystardyń basym kópshiligi jyldar boıy nazardan tys qalyp keledi. Tıisinshe olardy jóndeý jáne jańǵyrtý is-sharalary sý salasyn damytý josparyna engizilmeı qalady. Osyndaı qurylystardyń basym kóbisi 30 jyldan astam ýaqyt paıdalanyp keledi. Olardyń 70%-dan astamynyń tozyǵy jetken. Sondyqtan olardyń beriktigi men qaýipsizdik deńgeıi aıtarlyqtaı tómendedi. Sý tasqynyna qarsy aldyn alý is-sharalaryn josparlaý, sondaı-aq olardy qarjylandyrý isinde túıtkildi máseleler bar», dedi Artýr Platonov.
Al Tótenshe jaǵdaılar mınıstri Iýrıı Ilınniń aıtýynsha, byltyr sý tasqynyna qarsy atqarylǵan jumys 213 eldi mekenniń sý basý qaýpin boldyrmaýǵa jáne 120 myńǵa jýyq úı ornalasqan ózge de 580 eldi mekendegi qaýipti barynsha azaıtýǵa múmkindik bergen. Onda 550 myńnan astam adam turady. Alaıda jergilikti ákimdikterdiń ýaqtyly aldyn alý jumysyn júrgizbeýi negizgi máseleniń biri bolyp qalyp otyr.
«Turǵyndar aryq júıesin bireý kelip tazalap beredi dep kútip otyrady. Iаǵnı bizdiń qyzmetkerler kóbine-kóp kommýnaldyq qyzmetterdi atqaryp júredi. Alaıda bul Tótenshe jaǵdaılar mınıstrligine tán mindet emes. Biz órtke qarsy qyzmet bólimshelerin, áskerı bólimderdi jáne jedel-qutqarý jasaqtaryn aýlany sýdan tazartý jumysyna jumyldyrýǵa májbúrmiz», dep atap ótti mınıstr.
Otyrys qorytyndysy boıynsha komıtet músheleri sý tasqyny qaýpi bar óńirlerdegi túıtkildi máselesi kóp gıdrotehnıkalyq qurylystarda partııalyq baqylaý beketterin ashý jóninde qaýly qabyldady. Tıisti nátıje bolýy úshin partııalyqtar ákimdikterge aryqtar men kanaldardy, drenaj júıelerin, ózen arnalaryn muzdan jáne qoqystan tazartý jumysyn ýaqtyly aıaqtaýdy mindetteý úshin usynys engizbekshi. Sondaı-aq gıdrotehnıkalyq qurylystardy salý jáne jóndeý jónindegi jobalardyń jobalyq-smetalyq qujattamasyn ázirleý rásimin jedeldetý men sý sharýashylyǵy qurylystaryn paıdalaný qaǵıdalarynyń saqtalýyn tekseretin arnaıy jumys tobyn qurýdy da usynyldy.
