Jýalyda kartop jaqsy ósedi

Basqa-basqa, Jýaly jerinde kartop jaqsy ósedi. Buǵan, bálkim, osy topyraqtyń qunarly, aýa raıynyń qolaıly bolýy da áser etetin bolar, sirá. Áıteýir, sońǵy jyldary Jýaly jurty daqyldyń osy túrinen kóp ónim alýdy jaqsy meńgerip keledi. Búginde óńirdiń taýly-qyrly dalasynda kartop ósirýmen 520-ǵa jýyq sharýashylyq aınalysady. Árıne, barlyǵy derlik usaq sharýashylyqtar, biraq, eshqaısysy da bul kásip­­terinen qol úzgisi kelmeıdi. Sodan bolar ótken jyly jýalylyqtar kartop alqabyn 1910 gektarǵa jetkizse, bıyl bul kórsetkishti 2110 gektardan asyrypty. Sol kóp sharýashylyqtyń ishinde «Zylıhanyń» shoqtyǵy bıik. Osy istiń kózin taýyp, tynymsyz eńbeginiń arqasynda kóp ónim alýǵa qol jetkizip júrgen «Zylıha» sharýa qojalyǵy ótken jyly Reseı men Gollandııadan kartop ákelgen bolatyn. Endi bıyl bul iske nemistiń ozyq tehnologııasyn endirip, kartopty golland ádisimen ekti. Jalpy syıymdylyǵy 1 800 tonnany quraıtyn eki qoımasy bar bolǵandyqtan qysty kúnderi oblys turǵyndarynyń suranysyn qamtamasyz etýmen qatar ónimderin elimizdiń túkpir-túkpirine tasymaldaıdy. Árıne, árbir tirlikti saraptap, mol ónimniń syry men qyryn zertteýden jalyqpaıtyn «Zylıha» kartoptan kóp paıda baryn bilgennen bolar, jyl saıyn alqap kólemin ulǵaıtyp keledi. «О́tken jyly 120 gektar jerge ektik, bıyl kartop alqabyn taǵy 30 gektarǵa ulǵaıttyq. Byltyrǵy ónimnen 450 tonna kartopty tuqym retinde alyp qaldyq ta, basqalaryn satyp, tabys taptyq», deıdi sharýa qojalyǵynyń tóraǵasy Kerimqul Begalıev. Búginde elimizde kartop sha­rýa­shylyǵyn damytý úshin kóp jeńildikter jasalýda. Bul, árıne, jýalylyqtardyń kartoptan kóp ónim alýyna jaqsy jaǵdaı jasaıdy. «Zylıha» sharýa qojalyǵy kelesi jyly 5 myń tonna ónimdi saqtaıtyn qoıma men jemis-jıdekti óńdeıtin shaǵyn zaýyt salýdy josparlap otyr. Oralhan DÁÝIT, «Egemen Qazaqstan». Jambyl oblysy. Sýretti túsirgen Aqádil RYSMAHAN.