Prezıdentke joǵarǵy palatanyń zań shyǵarý qyzmeti týraly baıandaldy. Senattyń Parlamenttegi qyzmeti bastalǵannan beri 21 zań maquldanyp, qabyldanǵan. Onyń ishinde eńbek daýlaryn sheshý, turǵyn úı-kommýnaldyq sharýashylyq, sıfrlyq aktıvter, sondaı-aq Salyq kodeksine ózgerister men tolyqtyrýlar engizý týraly zańdar qaralǵan.
Máýlen Áshimbaevtyń málimeti boıynsha qazirgi ýaqytta Senatta Memleket basshysynyń tapsyrmasymen ázirlengen mańyzdy zań jobalary qaralyp jatyr. Atap aıtqanda, aldaǵy kezeńde 2023 jylǵa arnalǵan respýblıkalyq bıýdjetti naqtylaýdy, Áleýmettik kodeksti, sondaı-aq ákimshilik reforma, adam quqyqtary jáne azaptaýlardyń aldyn alý, memlekettik qyzmet máselelerine qatysty zań jobalaryn qarastyrý josparlanyp otyr.
Prezıdentke palatanyń sot júıesin reformalaý jáne prosessýaldy zańnamany jetildirý jumystary týraly aqparat berildi. Qasym-Jomart Toqaevtyń tapsyrmalaryn oryndaý aıasynda Senatta jumys toby qurylǵan. Bul top 60-tan astam otyrys ótkizip, 350-ge jýyq usynys jınaǵan. Atalǵan jumystyń nátıjesinde eki zań jobasy ázirlendi.
Sonymen qatar Memleket basshysyna Senat jumysyndaǵy óńirlik kún tártibin nyǵaıtýǵa, Álemdik jáne dástúrli dinder kóshbasshylary seziniń ıdeıalaryn ilgeriletýge baǵyttalǵan is-sharalar tanystyryldy.
Qasym-Jomart Toqaev elimizdi áleýmettik-ekonomıkalyq turǵyda keshendi damytý jónindegi reformalardy odan ári qoldaýǵa baǵyttalǵan zańnamalyq qyzmetti jalǵastyrý qajet ekenin atap ótti.
