«Sıfrlyq tehnologııalar men ınnovasııalardy paıdalaný arqyly áıelderdiń jaǵdaıyn jaqsartý jáne múmkindikterin keńeıtý» atty taqyrypta bastalǵan sessııany BUU Bas hatshysy Antonıo Gýterrısh ashty. Áıel-qyzdardyń qoǵamdaǵy múmkindikterin keńeıtip, genderlik teńdikti damytýdy qamtamasyz etý úshin áýeli olardyń bilimin jetildirý, ǵylym-tehnologııany, ınjenerııa men sıfrlyq saladaǵy kóshbasshylyǵyn qoldaý maqsatynda qaýipsiz jelilik ortany qalyptastyrý týraly úndeý tastady.
Bul retki sessııaǵa úkimettik emes uıymdarmen qatar ǵylymı-saraptamalyq qaýymdastyqtyń beldi ókilderi jáne álemniń 190-nan astam elinen delegat qatysyp jatyr.
Álem mınıstrleriniń alqaly jıynyn Mońǵolııanyń Eńbek, áleýmettik qamqorlyq mınıstriniń orynbasary Zulpyqar Sarqytuly basqardy. Vıse-mınıstr BUU-nyń bıik minberinde aǵylshyn tilinde baıandama jasap, májilis basqarǵan tuńǵysh mońǵolııalyq qazaq azamaty bolyp, el mereıin ósirdi.
Assambleıa tóraǵasynyń orynbasary Zulpyqar Sarqytuly: «Ǵalamtor jelisindegi genderlik aıyrmashylyqty joıýda kezdesetin kedergilerdi eńsergen tańdaýly tájirıbe jáne genderlik teńdikti qamtamasyz etý úshin sıfrlyq dáýirdegi bilim berýdi damytýdyń mańyzdylyǵy erekshe», deıdi.
Sessııa barysynda ol onlaın-ortadaǵy genderlik alshaqtyqty joıý boıynsha Mońǵolııada júrgizip jatqan saıasaty men baǵyt-baǵdaryn tanystyryp, elimizdiń elektrondy basqarý qyzmeti halyqaralyq deńgeıde joǵary baǵalanǵanyn erekshe atap ótti.
Jıynda BAÁ, Bangladesh, Botsvana, Grýzııa, Meksıka, Nıderlandy, Vengrııa, Qytaı, Fılıppın, Chehııa, Ekvador, Japonııa qatarly elderden kelgen barlyǵy 23 ókili sóz sóıledi.
Sonymen qatar, 2023 jylǵy 7 naýryzda vıse-mınıstr Zulpyqar Sarqytuly Dúnıejúzilik bank jáne Áıelder mártebesi jónindegi komıssııanyń 67-sessııasynyń Bıýrosy nemese Ońtústik Afrıka Respýblıkasy, Argentına, Latvııa, Mońǵolııa men Germanııa birlesip uıymdastyrǵan Mınıstrler kezdesýine qatysty.
Joǵary deńgeıdegi sammıtke qatysýǵa 30 eldiń áıelder jáne genderlik máselelerge jaýapty mınıstrleri shaqyryldy. Bu kezdesýdiń maqsaty Dúnıejúzilik bank pen BUU-ǵa múshe memleketter arasyndaǵy 2023-2030 jyldarǵa arnalǵan genderlik máselelerdi qaıta qaraýdaǵy dıalogty qoldaý boldy.
Jıyn barysynda Zulpyqar Sarqytuly: «Turmystyq zorlyq-zombylyqqa qarsy zańnamanyń tıimdi iske asyrylýyn qamtamasyz etý boıynsha atqarylyp jatqan sharalar týraly mońǵolııalyq tájirıbesin bólisip, halyqty jumyspen qamtý salasynda atqarylyp jatqan is-sharalarmen tanystyrdy. Sondaı-aq sessııa barysynda «Genderlik teńdik jáne aýyl qyzdary men áıelderiniń quqyǵyn keńeıtý salasyndaǵy jetistikter men mindetter» taqyrybynda baıandama jasady.
6-naýryzdan bastalǵan bul mańyzdy shara naýryzdyń 17-ne deıin jalǵasady.
Qýat ÝATHAN,
Baı-О́lke aımaǵy
