«Jumystan úıge keshki 20.00-der shamasynda kelgen edim. Úıge jaqyndaǵannan-aq qarbalas qımyl, jıylǵan jurtty baıqadym. Búkil aýlamyz aıdyn kólge aınalǵan. Bizdiń janymyzdaǵy úıdiń jertólesine sý quıylyp ketipti. Kóp keshikpeı bizdiń úıdiń de asty sýǵa toldy. Qaýipsizdik úshin úıdi elektr jelisinen ajyrattyq. Men ózim qujattarymdy ázirlep, túngi saǵat 03.00.-ge deıin uıyqtamadym», deıdi Murat Móńkeuly kóshesindegi №105/1 úıde turatyn Aıgúl Orazbekova. Móńkeuly kóshesinen kópqabatty 8 úıdiń jertólesine sý kirip, elektr jelisinen ajyratylǵany belgili boldy. Mine, bir táýlikke jaqyndady, ol úıler jaryqsyz otyr.
«2023 jylǵy 12 naýryzda saǵat 15.00-den bastap temperatýranyń +12 gradýsqa deıin kúrt kóterilýi jáne qardyń qarqyndy erýi nátıjesinde Sarytaý jáne «Svıstýn» taýlarynan (bıiktigi 300 m.) qalaǵa eńis jerlermen Zashaǵan kentiniń Saratov trassasy boıyndaǵy jumys istep turǵan arnalar boıymen sýdyń kóp mólsheri kelip, erigen sý kólemi jobalyq ótkizý qabilettiliginen asyp tústi. Nátıjesinde, Sarytaý shaǵyn aýdany boıynsha sý jaıyldy», dep habarlady Tótenshe jaǵdaılar departamentiniń baspasóz qyzmeti.
Móńkeuly kóshesindegi turǵyndardy qutqarý úshin jergilikti atqarýshy organdar, tótenshelikter, Ulttyq ulan sarbazdary tize qosyp jumylyp, 250-deı adam, 200-ge tarta tehnıka kenttegi turǵyn úılerdi odan ári sý basýǵa jibermeı alyp qaldy. Kópqabatty 2 úıdiń jertólesinen sý sorylyp, tazartylǵan.
Oral qalasy boıynsha 27 qurama-evakýasııalyq pýnkt bekitilgen. Sý basý qaýpi tóngen jaǵdaıda halyqty ornalastyrý úshin qosymsha 10 mektep, 1 mádenıet úıi jáne 1 sport kesheni ázir tur. Buǵan qosa qajet jaǵdaıda halyqty kóshirýge 30 avtobýs, Oral qalasynan 2 qonaqúı daıyndalǵan.
Aýdandardan da alańdaýshylyq bildirip jatqandar bar. Qaratóbe aýdanynda Qaldyǵaıty ózeni Aqqozy aýylynyń tusynda ótkeldi buzǵanyn, Qaratóbe – Jympıty aralyǵynda avtojol ústinen qarǵyn sý ótkenin, Bórli aýdanynda da qaýipti ahýal qalyptasqanyn halyqtyń ózi habarlap jatyr.
Báıterek aýdanynda TJD jedel-qutqarý jasaǵynyń qutqarýshylary dalada qalǵan 20 bas qoıdy qutqaryp, sýdyń arǵy betinen motorly qaıyqpen alyp shyqqan.
Batys Qazaqstan oblysy
