Bul týraly Astana qalasynyń ákimi Jeńis Qasymbek óziniń Instagram paraqshasynda jazdy.
«Elordamyzdyń ekonomıkasynyń negizin shaǵyn jáne orta bıznes quraıdy. Qala turǵyndary men qonaqtary olardyń qyzmetin kún saıyn paıdalanady
Sol sebepti biz kásipkerlerge qoldaý kórsetý, jeke ınvestısııalar tartý, qalanyń bıznes-ahýalyn odan ári jaqsartý boıynsha úlken júıeli jumys júrgizip kelemiz.
Bıyl 25 ınvestısııalyq jobany iske qosýdy josparlap otyrmyz. Máselen bul jobalardyń arasynda ónerkásip, logıstıka, medısına, bilim berý, sport, agroónerkásiptik keshen jáne t.b. bar. Bul jobalar elorda ekonomıkasyna shamamen 87 mlrd teńge jeke ınvestısııa tartýǵa, turaqty jumys oryndaryn ashýǵa múmkindik beredi», dep jazdy qala ákimi.
Ákimniń aıtýynsha, fýlfılment-ortalyǵy 40 mlrd teńge jeke ınvestısııa tartýǵa múmkindik beredi.
«Vıse-premer – Saýda jáne ıntegrasııa mınıstri Serik Jumanǵarınmen birge Ozon fýlfılment-ortalyǵyn ashtyq. Bul – kásipkerlerge onlaın-bıznesti keńeıtýge múmkindik beretin iri logıstıkalyq hab. Onda 9 mln-ǵa deıin túrli taýarlardy saqtaýǵa bolady: azyq-túlik, elektronıka, qurylys materıaldary jáne t.b. Atalǵan fýlfılment-ortalyq 40 mlrd teńge jeke ınvestısııa tartýǵa múmkindik berdi.
Sol sııaqty qalada jeke qarajat esebinen áleýmettik nysandardyń (mektepter, balabaqshalar, medısınalyq ortalyqtar), zaýyttardyń, logıstıkalyq ortalyqtardyń, óndiristik-tamaq kesheniniń (nan zaýyty, sút óńdeý zaýyty, kókónis qoımasy) jáne t.b. qurylysy júrip jatyr», dedi Jeńis Qasymbek.
