Jurttyń janaıqaıy el «avtoban» atap ketken «Batys Eýropa – Batys Qytaı» avtodálizinen qumyǵyp shyǵady. Aıǵa jetpes ýaqyt buryn «Shymkent SpesStroı» JShS-ǵa qarasty qyzmetkerler jalaqynyń azdyǵyn aıtyp daý shyǵarǵan edi. Endi «ShymkentSpesKompleks» JShS-nyń jumysshylary aılyq máselesin alǵa tartyp, janaıqaıyn jaıyp saldy.
Eńbekaqynyń azdyǵy júıkesine ábden shı júgirtse kerek, jol tazalyǵyna jaýapty seriktestik qyzmetkerleri aılyqty 30 paıyzǵa kóbeıtýdi talap etti. Bas kótergen jumysshylardyń ýájine sensek, keıingi ýaqytta jalaqy keshiktirilip berilip kelgen. Ol az deseńiz, zeınetaqy tólemi toqtaǵan. Al qyzmetkerler 170 myń teńge eńbekaqyny azsynyp otyr. Aıtýynsha, alatyn jalaqylary jan baǵýǵa jetpeıdi. Al atqaratyn jumys aýqymy az emes.
Qysqasy, «ShymkentSpesKompleks» JShS qyzmetkerlerimen ózara kelisimge kele almaı otyrǵan sekildi. Sodan da bolsa kerek, aılyqtyń máselesin kótergen otyzdan asa jumysshy qýdalaýǵa ushyradyq dep narazylyq tanytyp otyr. Osyndaıda «Arqa jaıly bolsa, arqar aýyp nesi bar» degen maqal eriksiz eske túsedi eken.
Jýaly aýdany men Merki aýdany aralyǵyndaǵy respýblıkalyq aqyly joldy kútip ustaýdyń mehnaty zor ekeni aıtpasa da túsinikti. Jol boıyndaǵy tazalyqqa jaýap beretin qyzmetkerler tıisti qurylǵylarmen qamtylýy kerek-aq. Alaıda olar qorshaý bitkenniń qadasyn ekskavatordyń shómishimen qaǵyp júrmiz deıdi. Aıtýynsha, qajetti qurylǵylar joqtyń qasy kórinedi.
«Bizdegi qyzmetkerler de, júrgizýshiler de, mehanızatorlar da qolmen jumys isteýge májbúr bolyp júr. Eshqandaı tehnıka joq deýge de bolady. Basymyzdy báıgege tigip, bar degen qaýipti tehnıkalarmen jumys istep jatyrmyz. Osy máselege bas aýyrtatyn jan tabylar ma eken?», deıdi júk kóliginiń júrgizýshisi Maqsat Ájibaev ashynyp.
Derekterge sensek, avto dálizdiń tazalyǵyna jaýapty mekemeniń ishki jumysyna «QazAvtoJol» mekemesi aralasa almaıtyn kórinedi. Jalaqyny tóleý máselesin tapsyrys alǵan seriktestik ózi sheshedi. Al seriktestik basshylary jalaqy berilmeıdi degen áńgimeni joqqa shyǵaryp otyr. Olar áleýmettik tólem de toqtamaǵanyn aıtady. Áıtse de, jol jóndeý jumysynda tekserýler oryn alatyny málim. Tıisti tekseristerden keıin ǵana jalaqy qyzmetkerlerdiń shotyna aýdarylatynyn, saldarynan eńbekaqynyń keshigetinin joqqa shyǵarmaıdy. Belgilisi sol, jumysshylardyń talaby jaqyn arada oryndalmaıtyn sııaqty. Seriktestik jetekshileri eńbekaqyny jýyq arada ósirý múmkin emes degendi alǵa tartyp otyr. Al óz mindetin tıisti deńgeıde oryndamaǵan alty qyzmetker jumystan bosaǵan eken.
«Qyzmetkerlerdiń jumysyn júıeleıtin sheberlerdiń qateliginen eńbekaqy keshiktirilip berilip jatyr. О́kinishke qaraı, qalǵan adamdar solardyń sońyna erip, jumys ornyn tastap ketkendikten, zań júzinde akt toltyrylyp, mindetin durys atqarmaǵandar jumystan bosady. Ol kisiler jumystaryn ármen qaraı jalǵastyrýǵa nıetti bolsa, seriktestik basshylary olardy qaıtadan jumysqa qabyldaýǵa esh qarsy emes», deıdi «ShymkentSpesKompleks» JShS dırektorynyń orynbasary Maqsat Qurmantaı.
Qalaı desek te, avtodáliz boıyn tazalaý jumystarynyń ońaı emes ekeni anyq. Qyzmetkerler tıisti qurylǵylarmen qamtylyp, ýaqyt talabyna saı eńbek etse, odan seriktestik basshylarynyń utylmaıtyny daýsyz. Al jalaqyny kóterý máselesi jýyq arada sheshimin tappaıdy dep qarap otyrý qanshalyqty aqylǵa qonymdy? Qymbatshylyq qos búıirden qysqan ýaqytta jumysshylar da laıyqty eńbekaqy alýǵa tıis emes pe? Bálkim, seriktestik basshylary bul máseleni de ońynan sheshýge den qoıǵany jón shyǵar.
Jumysshylar kótergen daýdan keıin «QazAvtoJol» Ulttyq kompanııasynyń resmı ókili Lázzat Stamǵazıeva ún qatqan. Onyń sózinen túsingenimiz, eńbekaqyny kóterý máselesin, joǵaryda aıtqanymyzdaı, qazirgi kezdegi zańnamaǵa sáıkes jaýapty seriktestik basshylyǵy ózi sheshedi. Al ulttyq kompanııa men merdiger mekeme arasyndaǵy kelisimshartqa qatysty tolyqqandy tekserý jumystary júrgizilmek. Nátıjesi ýaqyty kelgende jarııalanbaq. Qysqasy, joǵary laýazymdy tulǵalar aralaspaıynsha, jumysshylardyń jalaqysyn kóterý máselesi ekitalaı bolyp tur.
Jambyl oblysy
