Munyń bir sebebi – kórshiles elderdiń kóptegen týrısi kýrortty aımaqtarymyzǵa saparlaıtyn avtomobıl joldarynyń jaı-kúıi syn kótermeıtindiginde. Máselen, Qazaqstandaǵy týrızmdi damytýda TOP-10-ǵa engizilgen keleshegi kemel týrıstik baǵyttar sanalatyn Kókshe óńirindegi áıgili Býrabaı jáne Soltústik Qazaqstan oblysynyń Aıyrtaý aýdanyndaǵy Imantaý-Shalqar kýrorttyq aımaqtaryna jazǵyturym Reseı Federasııasynan aǵylatyn týrıster sanyn kóbeıtý úshin respýblıkalyq mańyzdaǵy Omby – Kókshetaý tas jolynyń Dáýit stansasy men Bıdaıyq aýyly aralyǵyndaǵy ábden tozǵan shurq-tesik ýchaskesin qalpyna keltirmeı bolmaıdy.
Jýyrda Soltústik Qazaqstan oblysy Ýálıhanov aýdanynyń ortalyǵy – Kishkenekól aýylynyń ardagerlerimen kezdeskenimizde, olardyń kótergen basty máselesi de osy jol ýchaskesiniń «jyry» boldy.
«Elimizdiń shekarasynda ornalasqan Bıdaıyq aýylynan Dáýit stansasyna deıingi 105 shaqyrym asfalt jol oıdym-oıdym bolǵandyqtan, jolaýshylardyń zyqysyn shyǵarady ári kóliktiń dońǵalaqtaryn da búldirip tastaıdy. О́gizaıańmen qyrýar ýaqytyń da tekke ketedi. Al Bıdaıyqtan ári Reseı Federasııasynyń Omby oblysy bastalady. Joly taqtaıdaı tegis. Sol jaqtan jazda ataqty Býrabaı kýrortyna jáne sýy móldir Shalqar men Imantaý kólderine demalýǵa baratyn orys-qazaq aǵaıyndardyń sanynda esep joq. Tek osy 105 shaqyrym jol olardyń júıkesin tozdyryp, «Álemdegi ozyq 30 eldiń qataryna qosylýdy maqsat tutqan Qazaqstan osy ma?» dep synap jatady. Olardyń aldynda óz memleketimiz úshin uıalyp, kózimizben jer shuqımyz. Osy másele haqynda on shaqty jyldan beri oblys basshylaryna da, Parlament Senaty men Májilisiniń depýtattaryna da talaı márte shaǵyndyq. Tek bıyl ǵana Dáýitten Kishkenekólge deıingi jol ýchaskesin jóndeýge qarjy bólinipti dep estidik. Bul jumystyń ózi 27 aıǵa sozylmaqshy eken. Al Bıdaıyqqa deıingi 55 shaqyrym joldyń qashan qalpyna keltiriletini belgisiz. О́ıtkeni onyń jobalyq-smetalyq qujattamasy áli kúnge jasalmapty. Úkimetimiz týrızmdi damytamyz dep jalań urandatqansha, kýrorttarǵa baratyn joldardy túzemeı me?!» desti kishkenekóldik aqsaqaldar.
Iá, reseılik týrıster aldynda táýelsiz memleketimizdiń bedelin túsirip ári Soltústik Qazaqstan oblysy Ýálıhanov jáne Aqjar aýdandary turǵyndarynyń barys-kelisin qıyndatyp, tıtyqtaryna tıip turǵan respýblıkalyq mańyzdaǵy A-13 Kókshetaý – Omby avtomobıl jolynyń jaı-kúıin Indýstrııa jáne ınfraqurylymdyq damý mınıstrliginiń joǵary laýazymdy sheneýnikteri ádeıilep baryp óz kózderimen kórmese, ony qalpyna keltirý isi taǵy da sozbaqqa salynýy múmkin. Sondaı-aq Alakól men Balqash kólderiniń jaǵasyndaǵy týrıstik oryndarǵa baratyn avtomobıl joldarynyń jaǵdaıy da jetisip turǵan joq. Onyń ústine, jolaýshylardyń júıkesine tıetin júzdegen shaqyrym sapasyz joldardyń boıynda jaıly dárethanalar men zamanaýı servıs obektileriniń joqtyǵy da týrısterdi kóptep tartýǵa kedergi keltiretini anyq.
Qazaqstan Respýblıkasynyń týrıstik salasyn damytýdyń 2026 jylǵa deıingi tujyrymdamasynda týrızmniń elimizdiń ishki jalpy ónimindegi úlesin 8,2 paıyzǵa jetkizý mindeti qoıylǵan. Ony júzege asyrýǵa atalǵan tujyrymdamany ázirlegen Mádenıet jáne sport mınıstrligi ǵana emes, ortalyq jáne jergilikti atqarýshy organdardyń barlyǵy jaýapty. Tek olar «aqqý – kókke, shortan – kólge, shaıan – shólge tartqan» áıgili mysaldaǵydaı bilek biriktire almaı jatsa, kózdegen maqsattyń oryndalýy ekitalaı. Bul rette jańa Úkimet týrızm salasyna keshendi kózqaraspen qarap, óziniń úılestirýshilik fýnksııasyn pármendilikpen qoldansa, quba-qup.
