О́ńir basshysy oblys turǵyndaryn tynyshtyq saqtaýǵa shaqyrdy.
«Qurmetti mańǵystaýlyqtar! Qadirli jerlester! Bul jaǵdaı barshamyzdyń kóńilimizge qaıaý túsirip otyrǵany jasyryn emes. Osy sátte biz ashý ústinde asyǵys sheshim qabyldamaı, sabyr saqtaǵanymyz jón. Biz kez kelgen túıtkildi másele men qıyndyqtardy aqylmen sheship, abyroımen alyp kelemiz. Qoǵamdaǵy shıelenisti odan ári ýshyqtyrý, zań men quqyqtyq normalardy buzý - bul jaǵdaıdyń turaqsyzdanýyna ákeledi, máseleni sheshpeıdi. Ardaqty aǵaıyn! Barshańyzdy sabyr saqtap, el tynyshtyǵyn buzbaýǵa shaqyramyn! Biz bul jaǵdaıdyń tek zań sheńberinde ádil sheshilgenin qalaımyz. Barshamyzdyń maqsatymyz bir - erteńgi kúnge degen senimdilik pen eldiń amandyǵy, jurttyń tynyshtyǵy. Qazir ásirese arandatýshylarǵa erip ketpeı, olardyń el ishine iritki salyp, tynyshtyqty buzýyna jol bermeýimiz qajet. Bárimizdiń maqsatymyz bir. Halqymyz adal eńbek etip, atqarǵan jumysyna saı eńbekaqysyn alyp, erteńine senimmen qarap, syılastyqta ómir súrýdi qalaımyz jáne ony júzege asyrý úshin jumys istep jatyrmyz», dedi N.Noǵaev.
Budan soń ol osyǵan deıin halyqtyń talaı syn-saǵattardan ótkenin eske saldy.
«Bul túıtkildi de aýyzbirshilikpen, yntymaqpen eńseremiz dep senemin. Halqymyz tynysh, el irgesi bútin bolsyn!», dedi Nurlan Noǵaev.
Eske salaıyq, 10 sáýirde Jańaózennen Astanaǵa «QazMunaıgaz» ben «О́zenmunaıgazǵa» qyzmet kórsetetin «BerÁli Mańǵystaý Company» kásipornynda jumys istegen 60-70-ke jýyq qyzmetker baryp, Energetıka mınıstrligi ǵımaratynyń mańynda talaptaryn aıtty. Olar jumystan qysqaryp qalǵan. О́ıtkeni «QazMunaıGaz» uıymdastyrǵan tenderde «BerÁli Mańǵystaý Company» jeńilip, «Kezbı» jáne Ai-Bis kompanııalary jeńgen. «QazMunaıGaz» kompanııasy jumysshylarǵa tenderdi jeńgen eki kompanııadan jumys usynǵan. Alaıda narazylar bul usynysqa kelispeı, «toǵyz aıdan soń taǵy tender ótip, taǵy da jumyssyz qalamyz, bizge turaqty jumys kerek» degen edi.
11 sáýirde Astana polısııasy ereýilge qatysýshylardy ustap, polısııa bólimshesine jetkizgen.
Áleýmettik jelide Energetıka mınıstrligi ǵımaratynyń mańynda bir táýlik boıy narazylyq bildirip, túnep shyqqan jumysshylardy arnaıy jasaq áýeli kettlıng ádisimen qorshap, keıin ustap jatqan sáti túsirilgen vıdeo tarady.
