Velosıped dońǵalaǵyndaǵy esirtki

Talaı brıfıngti kórip júrgen jýrnalıs­ter bul jolǵy basqosýǵa aıryqsha asyqqandaı kórindi. Onyń ózindik sebebi de bar edi. Aqmola oblystyq ishki ister departamentiniń bastyǵy, polısııa general maıory Jaılaýbek Halyquly kúni keshe quryqtalǵan narkoshabarman men ol oblys aýmaǵymen alyp ótpek bolǵan iri kólemdegi esirtki jaıynda keńinen áńgimelep berý nıetinde eken. Tárkilengen taza geroınniń salmaǵy 9 kılo 362 gramdy quraıdy. Bul óńirde buryn-sońdy bolmaǵan tótenshe oqıǵa retinde tirkelgen. General bizge 2 shilde kúngi 22.00 saǵat shamasynda, jedel izdestirý sharalary barysynda, «Qaraǵandy – Astana» kúre jolynyń boıyndaǵy Arshaly kentine jaqyn mańaıda «Folskvagen-Golf» jeńil kóliginiń toqtatylǵanyn habarlady. «Lada» atty qyzmettik-izdestirý ıtiniń kómegimen kólikti tintý barysynda bir-birine muqııat japsyrylǵan 9 velosıped dońǵalaǵy tárkilengen. Olardy ashyp qaraǵanda aqsur tústi, ózindik ıisi bar untaq tabyldy. Sot-medısınalyq saraptamanyń qorytyndysy bul zattyń asa qatty áser etetin «geroın» ekendigin anyqtaǵan. Osy rette geroınniń ár gramynyń «qara bazardaǵy» quny 1000 teńgeden ekendigi aıtyldy. Tekseris barysynda jeke kólik júrgizý­shisi, 1987 jyly týǵan narkoshabarman Qyrǵyz Respýblıkasy Ystyqkól oblysynyń Qyzyl sý aýylynyń turǵyny bolyp shyqty. Ol Reseı Federasııasynyń Qorǵan qalasyna baǵyt alyp bara jatyr eken. Atalǵan oqıǵaǵa baılanys­ty QR QK 259-babynyń 3-bólimimen (esirtki zattaryn zańsyz tasymaldaý) qylmystyq is qozǵalyp, Qyrǵyzstan azamaty ýaqytsha oqshaýlaý ornyna qamaldy. Osy oraıda, jyl basynan beri oblys aýmaǵynda 45 jedel-izdestirý sharalary ótkizilip, 104 esirtki qylmysy anyqtalǵanyn aıta ketkimiz keledi. Sondaı-aq, esirtkini zańsy saqtaǵany úshin 211 ákimshilik is qozǵalyp, esirtki qoldanyp kólik júrgizgen 60 adam ustalǵan. Baqbergen AMALBEK, «Egemen Qazaqstan». Aqmola oblysy.