Shyǵys Qazaqstan men Reseıdiń Altaı ólkesi birlese jumys isteýge múddeli

ASTANA. 9 shilde. Shyǵys Qazaqstan oblysy men Reseıdiń Altaı ólkesi shekaralas keńistiktiń erekshelikterin paıdalana otyryp, birneshe birlesken jobalardy qolǵa alýdy josparlaýda. Bul týraly «QazAqparat» habarlady. Taraptar birlese jumys isteý úshin aldymen birqatar máseleler boıynsha zertteý júrgizýdi qajet dep esepteıdi. Sol úshin shekaralas aýdandardaǵy jaǵdaıdyń damý serpinin kórýge múmkindik beretin buqaralyq aqparat quraldarynyń monıtorıngin qurý jáne óńirlik jáne óńiraralyq ótkir problemalardy anyqtaıtyn qurylymdyq-fýnksıonaldyq taldaý júrgizý isteri sheshimin tabýy tıis. Osy aıtylǵan jaǵdaıattardy basshylyqqa ala otyryp Shyǵys Qazaqstan oblysy ishki saıasat basqarmasy men Altaı ólkesiniń baspa jáne aqparat basqarmasy arasynda, sondaı-aq, «Shyǵys Qazaqstan oblysy taldaý jáne boljaý ınstıtýty» jaýapkershiligi shekteýli seriktestigi men Altaı memlekettik ýnıversıteti arasynda yntymaqtastyq pen birlesken jumys týraly memorandýmǵa qol qoıyldy. Shyǵys Qazaqstan oblysy taldaý jáne boljaý ınstıtýtynyń dırektory Oleg Chernyshev: «Túrli salalar, túrli mádenıetter, etnıkalyq, dinı toptar ókilderi men azamattyq qoǵam jáne memlekettik qurylymdar arasyndaǵy máseleler ózekti kúıinde qalyp otyr. Turaqty qoǵamdyq-saıası jaǵdaıdy qalyptastyrý jáne qoldaý úshin salany zertteý jáne ony ýaqtyly taldaý  asa mańyzdy», – dedi. Joldybaı Bazar. Derekkóz: «QazAqparat». Foto: aikyn.kz.