Búlingendi qalpyna keltirý, bardyń baǵasyn asyrý, qoǵamdy órkendetý men qalalyqtardyń jaıly turmysyn jaqsartý – jastardy eljandylyqqa tárbıeleý úshin kerek dúnıe. Taldyqorǵan qalasy, Gaýhar ana kóshesi 110 mekenjaıynda ornalasqan «Jas tehnıkter stansasy» dep atalyp kelgen nysanda ótken respýblıkalyq ekosenbilikte osy uǵymnyń mańyzyna taǵy da bir márte kóz jetkizdik.
Atalǵan sharany «KazEco Patrol» RQB uıymdastyryp, onyń joǵary deńgeıde ótýine Taldyqorǵan qalalyq ákimdigi, qalalyq turǵyn úı-kommýnaldyq sharýashylyǵy bólimi, «Altyn Adam» Jetisý sheberler» ortalyǵy jáne Oqýshylar saraıy mekemesiniń qyzmetkerleri men ekoeriktiler atsalysty. Jalpy, senbilikke 100-den asa adam qatysty.
Aıta keterligi, atalǵan nysan qalanyń ortalyǵynda ornalasqanymen, 36 jyldan beri qaraýsyz qalǵandyqtan, shóp basyp, qoqys úıilip, aǵashtary qýrap, jylyjaılardyń qańqasy qaýsap, surqy qashyp ketken eken. Qysqasy, 1970 jyldary irgesi qalanyp, sol tustaǵy ekologııaǵa qyzyǵatyn jastardyń jıi keletin jerine aınalǵan stansanyń búgingi jaǵdaıy aıanyshty. Sol kezde osy ortadan bolashaq armanyn ushtaǵandardyń biri búginde «Altyn Adam» Jetisý sheberleri» ortalyǵynyń dırektory, ulttyq óner men ekologııalyq máselelerge jiti nazar aýdaryp, týrızm salasyn órkendetýge bastamashy bolyp júrgen Dınara Bakırova osydan 40 jyl buryn ózi kýá bolǵan jaǵdaılarmen bólisti.
– Bastaýysh synypta oqyp júrgende bul stansaǵa jıi keletinbiz. Ol kezde aýmaqta neshe túrli aǵash ósip, san túrli gúl jaıqalyp turatyn. Jylyjaılarda ósimdiktiń san túri ósip, balalardyń qyzyǵýshylyǵyn arttyratyn. Keıin Taldyqorǵan oblysy Almaty oblysyna qosylǵan kezde bul jer qaraýsyz qalyp, múlki tonalyp, kezindegi bar kórkemdik kózden bulbul ushty. Qazir kórseńiz, qoqys alańyna aınalyp qaldy dersiń. Bul senbilik «KazEco Patrol» qozǵalysynyń oblystyq fılıalynyń ashylýyna tuspa-tus qolǵa alyndy. Maqsatymyz – bul nysandy qaıta jańǵyrtý ǵana emes, sonymen qatar balalardy qorshaǵan ortany qorǵaý isine belsendi qatysa alatyndaı etnoaýyl uıymdastyrý, – dep atap ótti Dınara Serikqyzy.
Senbilikke arnaıy kelip qatysqan «KazEcoPatrol» RQB jetekshisi Tımýr Eleýsizov atalǵan sharanyń ótýine jáne bolashaqtyq mańyzy bar bastamany qoldaǵan oblys basshylary men qala ákimdigine alǵysyn bildirdi. Sondaı-aq aldaǵy ýaqytta da birlese jumys atqarýǵa daıyn ekenin jetkizdi.
Aýmaqty tazartý jumysyn qala ákimdigi belsendi qoldap, jumysshylar men arnaıy tehnıkany da bóldi. Traktorlar, býldozer jáne birneshe «KamAZ» jáne tájirıbeli jumysshylar kúni boıy eriktilermen birge jumys atqardy.
– Bul nysan búginde qalalyq turǵyn úı-kommýnaldyq sharýashylyǵy bóliminiń menshiginde tur. Endi muny «Taldyqorǵan kórkeıtý» mekemesiniń quzyryna tapsyramyz. Aldymen osy nysandy tazalap, kúl-qoqysy shyǵarylyp, qýraǵan aǵashtar kesilip, aýla rettelgen soń aǵymdy jóndeý jumysy júrgiziledi. Sol qatarda túrli aǵash kósheti otyrǵyzylyp, gúl egiledi. Qazir 10 shtat ashylyp, qyzmetkerler alyndy. Aǵash kósheti men gúl qystaı osynda baptalyp, kóktemde qalanyń ár jerine otyrǵyzylady. Ony kútip-baptaý, ósirý jumysyna qaladaǵy ekologııalyq baǵytta jumys isteıtin qoǵamdyq birlestik músheleri men jas ekoeriktilerdi tartyp, olardyń tájirıbe jınaýyna da kómektesemiz, – deıdi Taldyqorǵan qalasy ákiminiń orynbasary Dııas Ahmetqalıev.
Aksııaǵa qalalyq Oqýshylar saraıynyń balalary da qatysty.
– Bul shara jas ekoeriktilerdiń qorshaǵan ortaǵa degen túsinigin tereńdetý úshin óte mańyzdy. О́ıtkeni jastar ózderi jasaǵan ortany aıalaýdy, qorǵaýdy búginnen bastap úıregeni durys. Oqýshylar saraıynyń oqýshylary aldaǵy ýaqytta da osyndaı sharalarǵa belsene qatysady, – deıdi Oqýshylar saraıynyń ádiskeri Merýert Muratqyzy.
Bir kúnde jalpy 80 tonna túrli qatty qaldyq pen qoqys jınaldy. Endi qoqystan tazalanǵan jerde kelesi kezekte atqarylatyn jumystar bastalmaq.
Jetisý oblysy
