Jıynda Memleket basshysy aldaǵy birlik kúni týraly aıtyp, onyń mańyzyna toqtaldy. Ári jyl saıynǵy ótetin jıyn jóninde sóz qozǵady.
«Elimiz jaqynda Qazaqstan halqynyń birligi kúnin atap ótedi. Bul – yrys-yntymaqty, tatýlyq pen kelisimdi dáripteıtin meıram. Qazaqstan úshin bul asa mańyzdy mereke. Elimiz Birlik kúnin mindetti túrde atap ótýge tıis. Sebebi qasıetti Otanymyzdyń irgesi bútin, tuǵyry myǵym bolsyn desek, birligimiz árqashan bekem bolýy kerek. Bul – anyq aqıqat.
Assambleıanyń alqaly jıynyn jyl saıyn el birligi kúnine oraı ótkizý dástúrge aınaldy. Bul sessııa – kóktem mezgilinde memlekettik deńgeıde ótetin eń aýqymdy is-shara. Munda elimiz úshin óte mańyzdy usynystar aıtylady», dedi Qasym-Jomart Kemeluly.
Sondaı-aq ol elimizde ótken referendým týraly atap ótti.
«Men byltyrǵy sessııada Ata zańymyzǵa ózgeristerdi referendým arqyly engizý týraly bastama kóterdim. Kóp uzamaı halqymyz óziniń tarıhı tańdaýyn jasady. Konstıtýsııaǵa engiziletin ózgeristerdi qoldap daýys berdi», dedi Prezıdent.
