«Barlyq azamattyń memlekettik tildi meńgerý máselesi saıasatymyzdyń strategııalyq baǵyty bolyp qala beredi. Qazaq tili – azamattyq ıntegrasııanyń tıimdi quraly, mádenı-rýhanı tutastyqtyń jarqyn kórinisi. Sondaı-aq qazaq tili ǵylymı progress pen bilimniń ozyq jetistikterine jol ashatyn quralǵa aınalýy kerek», dedi Prezıdent.
Memleket basshysynyń aıtýynsha, bul – tek salalyq mınıstrlikterdiń ǵana emes, búkil qoǵam bolyp sheshetin tarıhı mindet.
«Osy rette asyrasilteýshilik pen dańǵazalyqqa jol bermeı, parasatty ári dáıekti túrde áreket etken jón. Memlekettik tildi oqymaǵan jáne tıisti deńgeıde meńgermegen azamattar til bilmegeni úshin qysym kórmeýge tıis. Sonymen qatar bizdiń qoǵamda memlekettik tildi úırený, ony bilýge umtylý qalypty jaǵdaıǵa aınalýy qajet», dep atap ótti el Prezıdenti.
Sondaı-aq Q. Toqaev qazaq tiline suranys artqanda ǵana ol kópshilik keń qoldanatyn til bolatynyn aıtty.
«Túptep kelgende, birneshe til bilý – ár adamnyń mádenıettiliginiń belgisi. Al memlekettik tildi, ásirese ana tilin, ıaǵnı qazaq tilin bilý – qandaı da bir azamattyń mádenı óresi, azamattyq jaýapkershiligi qanshalyqty bıik ekenin bildiredi. Sondaı-aq qanshalyqty patrıot ekenin kórsetedi. Jalpy, memlekettik til tóńireginde oń kózqaras ustaný qajet. Til máselesine qatysty barlyq pikirtalas etnıkalyq emes, azamattyq jáne saıası sıpatqa ıe ekenin túsiný mańyzdy», dedi ol.
