Dúnıejúzilik eńbekti qorǵaý kúni qarsańynda Batys Qazaqstan oblystyq eńbek ınspeksııasy boıynsha basqarma basshysy Asylulan Dosjanov osyndaı derekterdi jarııa etti.
«Eldiń ornyqty damýy kóbinese eńbek resýrstarynyń jaı-kúıine baılanysty. Sondyqtan jazataıym oqıǵalardyń aldyn alý jáne qyzmetkerlerdiń eńbek jaǵdaıy qaýipsiz bolýyn únemi qadaǵalaımyz», deıdi Asylulan Tursynuly.
Máselen, 2022 jyly eńbek ınspektorlary «Qaýipsiz eńbek» aksııasy aıasynda 50-den astam ónerkásiptik jáne qurylys nysanyn teksergen. Baıqalǵan kemshilikter boıynsha jumys berýshilerge eskertý berilgen. Esepteri boıynsha birshama adamǵa eńbek qaýipsizdigi jáne eńbekti qorǵaý máselesi boıynsha túsindirý jumysy júripti.
Búginde Batys Qazaqstan oblysy kásiporyndarynda 428 óndiristik keńes bar eken. Olar óndiristik jaraqattanýdyń aldyn alý maqsatynda jumys ornyndaǵy eńbek jaǵdaıyna tekserý júrgize alady.
Sondaı-aq oblystaǵy belgili «Oral Taza Servıs», «Kúbileı», Oral «Zenıt» zaýyty, «QazArmaProm», «Kama Sentr», «№1 nan zaýyty», «Iskon», «Steklo-Servıs», «Agran», «Oral transformator zaýyty» syndy 10 kásiporyn «Halyqtyq baqylaý» jobasyn engizdi. Al 183 kásiporynda eńbek qaýipsizdigi jáne eńbekti qorǵaý boıynsha OHSAS 18001, MOT-SÝOT standarttary engizildi. 35 kásiporyn eńbek jaǵdaıy boıynsha attestattaýdan ótse, «Vizion Zero» tujyrymdamasyn qoldaý maqsatynda oblystyń 85 uıymy resmı saıtta «Kompanııa» retinde tirkeldi.
«Júrgizilip jatqan profılaktıkalyq is-sharalarǵa qaramastan, ótken jyly oblysta óndiristik jaraqat sany ósti», deıdi eńbek ınspeksııasynyń basshysy. Jazataıym oqıǵalar sany 10 paıyzǵa kóbeıgen. Sonyń ishinde 7 oqıǵa kezinde 20 qyzmetker zardap shekken. Bul toptyq jazataıym oqıǵa sany da artqanyn kórsetedi.
Saraptap qarasaq, 18 jazataıym oqıǵa bıýdjettik uıymdarda bolypty, 26 adam zardap shekken. Munaı ónerkásibinde bolǵan 9 oqıǵadan 10 adam túrli jaraqat alǵan. Energetıka salasynda – 9 adam, qurylys salasynda – 7 adam, mashına jasaý salasynda – 5 adam, aýyl sharýashylyǵynda – 4 adam, shaǵyn kásip uıymdarynda – 3 adam, kommýnaldyq sharýashylyq kásiporyndarynda – 3 adam, avtokólik salasynda – 1 adam, basqa da salalarda 3 adam zardap shegipti. Jazataıym oqıǵalar munaı-gaz, energetıka jáne qurylys salasynda kóbeıip ketken.
Batysqazaqstandyqtar kóbine jol kólik oqıǵalarynan, bıikten qulap nemese elektr toǵyna soǵylyp zardap shegedi eken.
A.Dosjanovtyń aıtýynsha, qurylys salasyndaǵy oqys oqıǵalardyń deni jumysty durys uıymdastyrmaýdan, aqaýly tehnıkany paıdalanýdan, eńbek qaýipsizdigin nashar oqytýdan jáne zardap shegýshilerdiń óz beıqamdyǵynan bolady eken.
Árıne, árbir jazataıym oqıǵa jan-jaqty tekserilip, jumys berýshiniń nemese zardap shegýshiniń kinási anyqtalady. Soǵan sáıkes tıisti sheshim shyǵarylady.
Osyndaı saraptama nátıjesinde Batys Qazaqstan oblysynda bolǵan jazataıym oqıǵalardyń sebep-saldary anyqtaldy. Kóz salaıyq: 21 adam jumys óndirisi óte nashar uıymdastyrylǵandyqtan oqys oqıǵaǵa ushyrady. Jol erejesi buzylǵannan – 18 adam, jábirlenýshiniń óreskel abaısyzdyǵynan – 16 adam, qaýipsiz eńbek tásilderin oqytýdaǵy kemshilikter saldarynan – 10 adam, eńbek qaýipsizdigi jáne eńbekti qorǵaý erejeleri buzylǵan sebepti – 4 adam, aqaýly mashınalardy, mehanızmder men jabdyqtardy paıdalanǵannan 2 adam zardap shekken.
Bıyl eńbek ınspektorlary «Qaýipsiz eńbek» aksııasy sheńberinde oblystyq kásipodaqpen, sondaı-aq «Amanat» partııasymen birlesip, jumyskerlerdiń eńbek jaǵdaıymen tanysý maqsatynda ónerkásiptik jáne qurylys uıymdaryn aralaýdy jalǵastyryp otyr. Memlekettik baǵdarlama boıynsha kóppáterli turǵyn úıler salyp jatqan «Altaır SK-7», «Bolashaq-T» kompanııalary tehnıka qaýipsizdigi erejeleriniń qarapaıym normalaryn saqtamaı otyrǵany anyqtalǵan. Keıbir jumysshylar joǵarǵy qabattarda qaýipsizdik beldigi men qorǵanys kaskasynsyz jumys júrgizgeni, qurylys aýmaǵy arnaýly lentamen qorshalmaǵany belgili bolǵan. Ol kompanııa basshylaryna kemshilikterdi joıý jóninde usynys berilgen.
«Jazataıym oqıǵa kóbine qandaı da bir tehnogendik qubylystan emes, jumys berýshi tarapynan baqylaý bolmaı, qyzmetker qaýipsizdik tehnıkasyn saqtamaǵanda, jeke qorǵanysh quraldary men arnaıy kıimmen qamtamasyz etilmegende, taǵy basqa adamı faktorlarmen baılanysty bolyp jatatyny ókinishti», deıdi A.Dosjanov.
Sondyqtan eńbek quqyǵyn qorǵaý máselesine barlyq qoǵamdyq ınstıtýt, jeke azamat ta atsalysýy qajet-aq.
Batys Qazaqstan oblysy
