Stalıngrad shaıqasy kezinde fashıst ushaqtary qazaq jerindegi Jánibek, Saıqyn, Shońaı temirjol stansalaryn birneshe márte bombalap, beıbit turǵyndar da qaza tapty.
– Bizdiń óńir soǵys kezinde maıdan shebindegi aımaq retinde Jeńiske zor úles qosty. Maıdanda atalarymyz jaýmen alyssa, tylda analarymyz aıanbaı eńbek etti. Sol bir qıyn kezeńde aryn – baıraq, namysyn – naıza etken erlerdiń qaharmandyǵy ańyzǵa aınaldy. Osy qasıetti jeńis kúni adaldyq pen eline degen janqııarlyqtyń úlgisin kórsetken qaharmandardyń rýhy aldynda bas ıip, taǵzym etemiz! – dedi Batys Qazaqstan oblysynyń ákimi Narıman Tóreǵalıev saltanatty is-sharada sóılegen sózinde.
Merekelik jıyn oblystyń barlyq aýdan-aýyldarynda ótti. Oblys ortalyǵynyń ózinde eki aptalyq is-sharalar tizbegi josparlanyp, keń kólemde atqaryldy. Jıylǵan qaýym Máńgilik alaýǵa gúl shoqtaryn qoıyp, soǵys jyldarynda qaza tapqan jaýyngerlerdiń rýhyna taǵzym etti.
Jeńis kúni Oral qalasynda Mánshúk, Álııa jáne Hıýaz beınelengen «Qazaq halqynyń dańqty qyzdary» eskertkishi alańyna, Keńes Odaǵynyń Batyry Temir Masın eskertkishine jáne «Ol kúnderdiń dańqy óshpeıdi» monýmentine gúl shoqtary qoıyldy. Sondaı-aq soǵys kezinde Oral qalasynda bolǵan áskerı gospıtalda qaıtys bolǵan jaýyngerler jerlengen «Baýyrlastar zıratyna» da taǵzym jasaldy.
Merekelik is-sharalar aıasynda atqarýshy bılik ókilderiniń tyl ardagerlerimen kezdesýi, kózi tiri soǵys ardagerlerin óz úıine baryp saltanatty túrde quttyqtaý is-sharalary ótti. Tasqala aýdanynda «Azaly ana» monýmenti kúrdeli jóndeýden keıin qaıta ashyldy. Oral qalasynda Batys Qazaqstan oblysynyń ardagerleri arasynda vokaldy toptardyń «Maıdan ánderi» atty oblystyq án baıqaýy ótti. Qazaq kúresi, aýdaryspaq, teńge ilý, uzaq qashyqtyqqa júgirý, alaman báıge, taı jarysy, toǵyzqumalaq sekildi ulttyq oıyndar, jasóspirimder arasynda kógaldaǵy hokkeı týrnıri, karateden (WKF) Keńes Odaǵynyń Batyry M.Mámetovanyń eske alýǵa arnalǵan «Aqjaiyq Open» halyqaralyq týrnıri sekildi kóptegen sporttyq saıystar da uıymdastyryldy.
Aıta keteıik, búginde Batys Qazaqstan oblysynda 16 soǵys ardageri qaldy. Olardyń 13-i Oral qalasynda turady.
Batys Qazaqstan oblysy
