Is-sharada baıandama jasaǵan Ishki ister mınıstriniń birinshi orynbasary, polısııa general-leıtenanty Marat Qojaev Memleket basshysy alǵa qoıǵan strategııalyq mindetterdiń basym baǵyttaryn júzege asyrý aıasynda ishki ister organdarynda ishki júıelikti qaıta qurý maqsatynda jasalyp jatqan jumystarǵa keńinen toqtaldy.
«Ádiletti Qazaqstandy qurý jolyndaǵy eń basty baǵyttardyń biri – qoǵamdyq qaýipsizdikti qamtamasyz etý. Ishki ister mınıstrligi – eldegi eń iri jáne jumys baǵyty aýqymdy quqyq qorǵaý organy. Elimizde tirkeletin barlyq qylmystyq isterdiń – 96, al ákimshilik óndiristiń 97 paıyzyn ishki ister organdary júrgizedi. Oǵan qosa, memlekettik qyzmetterdiń 39 túri boıynsha jyl saıyn 10 mıllıonnan astam qyzmet kórsetedi. Iаǵnı halyqpen eń jıi jáne tyǵyz jumys isteıtin organ – ol polısııa», degen mınıstrdiń birinshi orynbasary búginde el polısııasy zamanaýı servıstik modelge kóship jatqanyn aıtty.
Onyń aıtýynsha, zamanaýı servıstik modeldiń negizgi qaǵıdalaryna zańdylyq, jan-jaqtylyq, ádeptilik, habardarlyq jáne jedeldik jatady. Bul máseleler Qoǵammen birge qaýipsizdikti qamtamasyz etý tujyrymdamasynda kózdelgen. Qujattyń basty ereksheligi – qoǵamdyq qaýipsizdikti qamtamasyz etý salasyndaǵy jınaqtalǵan júıeli problemalardyń sebebin joıý.
Marat Qojaev strategııalyq qujattyń negizgi baǵyttaryna keńinen toqtaldy. Sonyń biri – ishki ister organdary jumysyn sıfrlandyrýdy jalǵastyrý. Onyń aıtýynsha, keıingi jyldary tártip saqshylaryna kólikterdi sebepsiz toqtatýǵa tyıym salyndy. Biraq onyń ornyna basqa eshqandaı sharalar engizilgen joq. Sonyń saldarynan jol erejesin óreskel buzatyn kólik júrgizýshileriniń qatary artqan.
– Jol qozǵalysyn qadaǵalaý úderisterin sıfrlandyryp jatyrmyz. Atap aıtqanda, ereje buzý faktilerin anyqtaıtyn avtomatty júıelerdi kóbeıttik. Búginde olardyń sany 18 myńnan asady. О́tken jyldyń ózinde olar 4 mıllıonnan astam zań buzýshylyqty anyqtady. Mundaı kameralar júrgizýshilerdi tártipke keltirip jatyr, – dedi ol.
Budan bólek, mınıstrdiń birinshi orynbasary qylmystyq isterdi sıfrlandyrý, IIO avto-sharýashylyqtaryn jańartý, modýldi posttar ornatý, polısııa qyzmetkerlerin áleýmettik qorǵaý sekildi ózekti máselelerge toqtalyp, jýrnalısterdiń suraqtaryna jaýap berdi.
