Rıgadaǵy 10 myń jankúıerge arnap salynǵan «Rıga Arena» muz saraıynda ótip jatqan V tobynyń oıyndary á degennen tartysty bastaldy. Álem chempıonatyna birde-bir legıonersiz, tek Qazaqstan hokkeı mektebiniń tárbıelenýshilerimen attanǵan jerlesterimiz mamandar tarapynan osy jahan birinshiliginiń aýtsaıderi sanalǵan bolatyn. Alaıda jerlesterimiz alǵashqy týrda-aq dúnıejúzilik dodaǵa upaı taratý úshin emes, upaı oljalaý úshin kelgenin baıqatyp, barsha shaıbaly hokkeı jankúıerleriniń tańdaıyn qaqtyryp, azýly Norvegııa quramasyn tize búktirdi.
Jasyratyny joq, alǵashqy kezeńde skandınavııalyq hokkeıshiler belsendi bolyp, bizdiń jigitter olardyń qarqynyna ilese almady. Birinshi kezeńniń segizinshi mınýtynda Mıkael Haga oıynnyń esebin ashsa, arada eki mınýt ótkende Ole Djýlıan Holm mergendik tanytyp, esepti eseleı tústi – 2:0. Degenmen, kezeńniń sońyna qaraı Maksım Muhametov Ádil Beketaev pen Batyrlan Muratovtyń nátıjeli pasynan keıin Norvegııa qaqpasynan sańylaý taýyp, tarazy basyn qysqarta aldy.
Birinshi kezeńniń sońǵy mınýtynda Kırıll Savıskıı eki mınýttyq kishi aıyppen jazalanyp, muzaıdynnan qýylǵan soń qonaqtar ekinshi kezeńdi san basymdyǵymen bastady. Nátıjesinde, 22-mınýtta Mıkael Haga dýbldiń avtory atanyp, norvegııalyqtar esepte taǵy da alǵa uzap ketti. Osydan keıin oıyn biraz saıabyrsyǵandaı boldy. Ekinshi kezeńniń aıaqtalýyna bes mınýt qalǵanda Qazaqstan quramasynyń kezekti bir shabýyly kezinde qarsylastardyń oıynshysy ereje buzyp, eki mınýttyq kishi aıyppen jazalandy. San basymdyǵyna ıe bolǵan jerlesterimiz sol múmkindikti tıimdi paıdalanyp, esep aıyrmasyn taǵy da qysqartty – 3:2. Goldyń avtory – Valerıı Orehov. Al úshinshi kezeńniń bel ortasynda Nıkıta Mıhaılıs tarazy basyn teńestirip, oıyndy overtaımǵa ulastyrdy – 3:3.
Al qosymsha mınýtta jeńimpaz anyqtalmaǵan soń, hokkeıshiler býllıt serııasynda baq synady. Bul kezeńde ulttyq qurama kapıtany 37 jastaǵy Roman Starchenko eki márte dáldik tanytyp, Qazaqstan quramasyna álem chempıonatyndaǵy alǵashqy jeńisti syılady. Qorytyndy esep – 4:3. Bul matchta Qazaqstan quramasy sapynan Batyrlan Muratov úzdik oıynshy atandy. Sonymen qatar Norvegııamen ótken matchta segiz otandasymyz álem chempıonatyndaǵy alǵashqy oıyndaryn ótkizdi. Olar: Maksım Muhametov, Batyrlan Muratov (ekeýi de 1999 jylǵy), Tamırlan Gaıtamırov (2000), Maksım Mýsorov, Artem Korolev, Álıhan О́mirbekov, Danııl Býtenko (barlyǵy – 2001 jylǵy) jáne Dinmuhamed Qaıyrjan (2003). Buǵan deıin atalǵan hokkeıshiler tek jasóspirimder jáne jastar arasyndaǵy álem chempıonattaryna qatysqan bolatyn.
Ǵalym Mámbetalıev shákirtteri keshe alǵashqy týrda Slovakııa hokkeıshilerinen basym túsken Chehııa quramasymen kezdesti.
