Memleket basshysy ekonomıkanyń barlyq salasynda, ásirese agroónerkásip kesheninde sýdy únemdi paıdalaný jáne sý shyǵynyn azaıtý úshin júıeli tásilder qajet ekenine toqtaldy. Sebebi toǵandardyń jáne sý resýrstary shyǵynynyń negizgi bóligi osy aýyl sharýashylyǵy salasyna tıesili.
Sý únemdeıtin tehnologııany engizý jáne sýdy tıimdi tutynýdy ekonomıkalyq turǵyda yntalandyrý sharalaryn damytýmen qatar, sý sharýashylyǵy ınfraqurylymyn, atap aıtqanda, sýdy paıdalaný mólsherin esepteý, monıtorıng júrgizý jáne boljam jasaý isin sıfrlandyrýdyń ózektiligi artyp keledi.
Qasym-Jomart Toqaev sý sharýashylyǵy nysandary jumysynyń tıimdiligin jáne bólinetin qarjyny jumsaýdyń ashyqtyǵy men nátıjeliligin arttyrý máselelerine erekshe nazar aýdardy.
Prezıdent Úkimetke ekologııa men sý salalaryndaǵy ǵylymı jáne kadrlyq áleýetti kúsheıtý úshin sharalar qabyldaýdy tapsyrdy. 2030 jylǵa deıin kezeńde sý resýrstaryn baǵalaý salasynda maqsatty ǵylymı-zertteý jobalary júzege asyrylady. Onyń nátıjesi sý salasyn basqarýda eskeriledi.
Memleket basshysy kún tártibindegi ekinshi máseleni talqylaý nátıjesinde sapaly aýyzsýdyń qoljetimdi bolýy sý qaýipsizdiginiń basty kórsetkishi ekenin atap ótti.
«Halyqty aýyzsýmen qamtamasyz etý jáne sý qoryn keleshek urpaqqa saqtaý úshin jan-jaqty sharalar qabyldaý – bizdiń tikeleı mindetimiz», dedi Qasym-Jomart Toqaev.
Jıyn sońynda ýákiletti memlekettik organdarǵa ulttyq qaýipsizdiktiń eń mańyzdy baǵyty sanalatyn sý qaýipsizdigin qamtamasyz etý jóninde birqatar tapsyrma berildi.
