Jerlesterimiz alǵashqy týrda Norvegııa quramasyn býllıt serııasynda tize búktirip, jigerli jeńiske jetken soń jankúıerler Ǵalym Mámbetalıevtiń shákirtterinen kelesi matchta da táýir nátıje kútken edi.
Alaıda otandastarymyz 1998 jylǵy Olımpıada chempıony, byltyrǵy álem birinshiliginiń qola júldegerinen jeńildi. Alǵashqy kezeńde Chehııa hokkeıshileri eki márte Andreı Shýtov qorǵaǵan qaqpadan sańylaý tapty. 9-mınýtta Iаkýb Zborjıl kezdesýdiń esebin ashsa, 16-mınýtta Domınık Kýbalık san basymdyǵyn júzege asyryp, tablodaǵy kórsetkishti 2:0-ge jetkizdi.
Ekinshi aınalymda jerlesterimiz qarqynyn arttyrǵanymen, Chehııa quramasynyń qaqpasyna shaıba soǵa almady. 30-mınýtta oıynnyń bas tóreshisi bizdiń qaqpaǵa býllıt belgilegenimen, ony Domınık Kýbalık golǵa aınaldyra almady. Jalpy, ekinshi kezeńde Andreı Shýtov belsendi oınap, qaqpasyna birde-bir shaıba darytqan joq. Esesine, 32-mınýtta Maksım Muhametov mergendigimen kózge túsip, esep aıyrmasyn qysqarta bildi.
Úshinshi 20 mınýttyqta da jerlesterimiz shaıba soǵyp, oıyndy overtaımǵa deıin ulastyratyn múmkindigi bolǵan edi. Biraq kóp hokkeıshimiz álem chempıonatyna, halyqaralyq deńgeıdegi jarystarǵa alǵash ret qatysyp jatqandyqtan ba eken, jalpy jıi qatelikke boı aldyryp, dóreki oınady. Nátıjesinde, hokkeıshilerimiz birinen soń biri eki mınýttyq aıyppen jazalanyp, qarsylastardyń basymdyǵyn paıdalanýyna múmkindik berip qoıdy.
Sońǵy kezeńde bizdiń qaqpaǵa soǵylǵan úsh shaıbanyń ekeýin Chehııa quramasy san basymdyǵyn paıdalanyp soǵyp ketti. Kezeń bastalǵan bette Lýkash Sedlak dáldik tanytsa, arada tórt mınýt ótkende Iаn Koshtalek Chehııanyń tórtinshi shaıbasyn soqty. Al básekeniń aıaqtalýyna bir mınýt qalǵanda Domınık Kýbalık dýbldiń avtory atanyp, oıynnyń núktesin qoıdy – 5:1.
V tobynda Shveısarııa, Kanada, Chehııa, Slovakııa, Norvegııa, Latvııa jáne Slovenııa quramalarymen baq synap jatqan jerlesterimiz búgin eki oıynda 6 upaı jınap, týrnır kestesinde kósh bastap turǵan Shveısarııamen kezdesedi.
