– Ekinshi dúnıejúzilik soǵys bastalarda ata-anam Belarýs Respýblıkasynyń shekarasyndaǵy Mozer qalasynda turypty. Ákem áskerı adam retinde zastavada qyzmet etken eken. Fashıstik Germanııa tutqıyldan shabýyl jasaǵanda shekarashylar kúshi basym jaýmen toǵyz aı boıy shaıqasypty. Sodan keıin ákem otbasyn úıde qaldyryp, ózi maıdandaǵy keńes áskerlerine qosylýǵa attanypty. Bizdi – ájem, anam jáne tórt baýyrymdy nemister tutqynǵa alyp, Kenıgsberg qalasynyń túbindegi gettoǵa aparyp tyqty. Men sheshemniń qursaǵynda ketken ekenmin, 1942 jylǵy 8 qazanda sol konslagerde týyppyn, – dep eske alady Marııa Mıhaılovna.
Soǵys bitken soń Marııa Shtýkardyń otbasy buryn ózderi turǵan Belarýstiń Mozer qalasyna baryp qonystanǵan. 1955 jyly ákesi qaıtys bolǵan soń sheshesimen birge Qazaqstannyń Aqmola qalasyna kóship kelgen. Ol 25 jasynda kásiptik-tehnıkalyq ýchılısheni támamdap, tońazytqysh qondyrǵysynyń mashınısi mamandyǵyn alǵan. Sol mamandyǵy boıynsha Selınograd oblystyq tutynýshylar qoǵamynyń tamaq kombınatynda uzaq jyldar abyroımen eńbek etti. Shańyraq quryp, úsh ul súıdi. О́kinishke qaraı, eki uly er jetken kezderinde qaıǵyly qazaǵa ushyrady. Qazir úshinshi toptaǵy múgedektigi bar uly Mıhaılmen birge turyp jatyr. «Uly Otan soǵysyndaǵy Jeńistiń 60 jyldyǵy» jáne «Uly Otan soǵysyndaǵy Jeńistiń 65 jyldyǵy» merekelik medaldarymen marapattalǵan. Jeńildikter boıynsha soǵysqa qatysýshylarmen teńestirilgen.
Sábı shaǵynan bastap taǵdyrdyń talaı taýqymetin basynan ótkizip kele jatsa da esh moıymaǵan Marııa Mıhaılovna qazir óz otbasynyń bir máselesin sheshe almaı áýre-sarsańǵa túsip júr. Naqty aıtsaq, onyń Astana qalasynyń Saryarqa aýdanyndaǵy Besterek kóshesinde ornalasqan jeke úıi bar. 1946 jyly salynǵan jalpy alańy 69,8 sharshy metr turǵynjaıynyń tozyǵy jetip, apattyq jaǵdaıda tur. Sondyqtan da 2004 jyly M.Shtýkar Astana qalasy ákimdiginiń 4 tamyzdaǵy №3-1-1566p qaýlysymen óziniń jeke úıi ornalasqan jer ýchaskesi kóppáterli turǵyn úıdiń qurylysyna alynatyny jáne turǵynjaıy súrýge jatatyny týraly habarlama alǵanda qýanyp qalǵan. Odan memleket muqtajdyǵyna alynatyn jer ýchaskesi men buzylatyn turǵynjaıyna aqshalaı ótemaqy tóletý týraly sheshimin sol jyldyń 1 qazanyna deıingi merzimde habarlaý da suralǵan edi.
Arada kóp ýaqyt ótpeı, M.Shtýkarǵa «Aq kerege» jaýapkershiligi shekteýli seriktestiginiń basshysy kelip jolyǵyp, kóppáterli turǵyn úı qurylysyn bastaý úshin aýyzsha ruqsat surap, ýádeni úıip-tókken. Onyń sózine sengen Marııa Mıhaılovna kelisimin bergen. Sóıtip, M.Shtýkardyń úıine tıip turǵan jerde qurylys jumystary bastalyp ketken. Alaıda qalalyq ákimdiktiń M.Shtýkardyń jer ýchaskesin memleket muqtajdyǵyna alyp, turǵynjaıyn súrip, ótemaqy tóleý týraly qaýlysy qaǵaz júzinde ǵana qalǵan.
Al kópqabatty turǵyn úıdi salý kezinde onyń jan-jaǵyna qorshaý ornatylmaı, qaýipsizdik tehnıkasy saqtalmaǵandyqtan, M. Shtýkardyń jeke úıiniń aýmaǵyna qurylys qoqystary túsip, densaýlyǵyna udaıy qaýip tóndirip turdy. Aqyry 2005 jylǵy 27 qyrkúıekte salynyp jatqan kópqabatty turǵyn úıdiń aýlasynda jumys istep júrgen ekskavator shómishinen onyń ústine topyraq túsip ketip, sol ıyǵyn jaralady. Sol úshin sot sheshimimen «Aq kerege» JShS M.Shtýkarǵa 30 myń teńge ótemaqy tóledi.
Bir qaıran qalarlyǵy, M.Shtýkardyń jer ýchaskesin memleket muqtajdyǵy úshin alý jáne turǵynjaıyn súrip, tıisti ótemaqy tóleý týraly Astana qalasynyń Jolaýshylar kóligi jáne avtomobıl joldary basqarmasy oǵan taǵy da bir emes, eki ret – 2011 jylǵy 12 qazanda jáne 2014 jylǵy 11 naýryzda jazbasha habarlama jiberipti. Biraq másele naqty sheshilmegen kúıi qalǵan.
Osy oraıda erekshe nazar aýdararlyq jaıt – 2009 jyly M.Shtýkardyń jazbasha suraýyna jaýap bergen Astana qalasy boıynsha Tótenshe jaǵdaılar departamenti kóppáterli turǵyn úıdi salý kezinde órt qaýipsizdigi talaptary buzylǵandyǵyn resmı moıyndaǵan. Atap aıtqanda, kóppáterli turǵyn úı men M.Shtýkardyń jeke úıiniń sharýashylyq qurylystary arasynda órtke qarsy qashyqtyq saqtalmaǵanyn rastaǵan. О́ıtkeni kóppáterli turǵyn úı M.Shtýkardyń jeke úıiniń qorasyna tym jaqyn salynǵan. Onyń turǵyndary balkonnan laqtyrǵan qoqys qora ústine jıi túsedi, al qatty jel soqqanda kóppáterli úıdiń qaptama materıalynyń elementteri ushyp túsip jatady. «Jaman aıtpaı, jaqsy joq» eger M.Shtýkardyń tozyǵy jetken aǵash qorasy órtense, ot kóppáterli turǵyn úıdiń tez tutanatyn alıýkobondtan jasalǵan qaptamasyna lezde aýysary anyq.
Jýyrda Marııa Shtýkar Astana qalasynyń ákimi Jeńis Qasymbektiń atyna ótinish jazyp, kóp jyldan beri sozbaqqa salynyp kele jatqan máselesin sheshýge kómektesýin suraǵan eken. Haty qala basshysyna jetpese kerek, Sáýlet, qala qurylysy jáne jer qatynastary basqarmasy basshysynyń orynbasary Nurhan Serikbaev qol qoıǵan jaýapty alyp, kóńili alańdap otyr. Degenmen onyń memlekettik organdardy jaılaǵan bıýrokratızmmen kúreste berilgisi joq. Endi ádildikti qaıdan izdesem eken dep oılanady. Sábı kezinen soǵys taýqymetin kórip, konslagerde azap shekse de eńsesin túsirmegen jannyń kókeıkesti máselesi keshikpeı sheshilse degen tilektemiz.
