Jıynda Bas prokýratýra ókilderi halyqaralyq sarapshylarǵa elimizde júrgizilip jatqan azaptaýlarǵa qarsy sharalar týraly aıtyp berdi. Atap aıtqanda, azaptaýlarmen qosa basqa da qatygez, adamgershilikke jatpaıtyn nemese ar-namysty qorlaıtyn is-áreketter men jazalaý túrlerine qarsy konvensııada bekitilgen quqyqtardyń elimizde saqtalýy jaıynda baıandama jasady.
Prezıdent janyndaǵy Adam quqyqtary jónindegi komıssııanyń tóraǵasy I.Rogov bastap barǵan delegasııa quramynda Birikken Ulttar Uıymynyń Jeneva qalasyndaǵy (Shveısarııa) bólimshesi janyndaǵy Qazaqstan Respýblıkasynyń Turaqty ókili E.Álimbaev, Bas prokýrordyń orynbasary B.Dembaev, sondaı-aq quzyretti memlekettik organdardyń ókilderi boldy.
Bas prokýrordyń orynbasary B.Dembaev óz sózinde Prezıdenttiń bastamasymen júrgizilip jatqan konstıtýsııalyq reformalar, ulttyq zańnamany odan ári jetildirý jáne adam quqyqtaryn qorǵaýdyń jańa tetikteri týraly baıandady. BUU komıtetiniń múshelerine elde Parlamenttiń rólin kúsheıtý, aralas saılaý júıesin engizý, saıası partııalardy tirkeý tártibin ońaılatý, Konstıtýsııalyq sot jumysynyń bastalǵany týraly keńinen málimet berildi.
Sonymen qatar halyqaralyq sarapshylarǵa azaptaýǵa qarsy is-qımyl jónindegi zańnamalyq jáne tájirıbelik sharalar keshenin iske asyrý týraly aqparat usynyldy. Olardyń ishinde prokýrorǵa azaptaýdy tergeý boıynsha aıryqsha ókilettikterdi bekitý, úzdiksiz beınebaqylaýdyń jumys isteýi, tergeý organdarynyń ǵımarattaryn ashyq tergeý kabınetterimen jaraqtandyrý, azamattardy ustaý jáne jetkizý kezinde beınejetondardy mindetti qoldaný sekildi jumys barysy tanystyryldy.
Elimizde azaptaý sekildi aýyr qylmys jasaǵandarǵa beriletin jaza kúsheıtildi. Máselen, kámeletke tolmaǵandardy, júkti áıelderdi azaptaý úshin 7 jyldan 10 jylǵa deıin bas bostandyǵynan aıyrý jazasy bekitildi. Olarǵa shartty túrdegi jaza berilmeıdi, raqymshylyq, taraptardyń tatýlasýy jáne qylmystyq qýdalaýdyń eskirý merzimi qoldanylmaıdy. Osy jáne ózge de málimettermen bólisken elimizdiń mamandary bıyldan bastap penıtensıarlyq mekemelerge medısınalyq qyzmet kórsetý azamattyq densaýlyq saqtaý júıesine berilgenin, bul da oqshaýlanǵan adamdarǵa qatysty qatygezdik jáne zorlyq-zombylyq kórsetý faktilerin obektıvti anyqtaýǵa yqpal etetinin jetkizdi.
Jıyn barysynda bulardan ózge ózekti máseleler, atap aıtqanda ekonomıkany monopolııasyzdandyrý, olıgopolııalarǵa qarsy kúres jáne zańsyz shyǵarylǵan aktıvterdi qaıtarý boıynsha júrgizilip jatqan jumystar týraly aıtyldy. Sonymen qatar, jýrnalıster men blogerlerdi qorqytý, shabýyldaý jáne múlkin órteý sekildi oqıǵalar oryn alǵany, elde júrgizilip jatqan reformalardyń bedelin túsiretin osy qylmystardy jasaǵan 22 uıymdastyrýshy áshkerelengeni málimdeldi.
BUU Komıtet músheleri elimizdiń azaptaýǵa qarsy konvensııa talaptaryn oryndaý boıynsha qabyldap jatqan sharalaryna joǵary baǵa berip, azamattardy joǵaryda atalǵan qylmystardan qorǵaýdy kúsheıtý boıynsha usynystaryn aıtty. Taraptar syndyrly dıalogty jáne odan ári yntymaqtastyqty jalǵastyrý úshin ózara senimhat almasty.
