Bul – birde-bir legıonersiz, tek jergilikti hokkeıshilerden quralǵan Qazaqstan ulttyq quramasynyń bıylǵy álem chempıonatyndaǵy tórtinshi kezdesýi jáne qatarynan úshinshi oıyndaǵy jeńilisi. Munyń aldynda bizdiń jigitter Chehııa quramasyna 5:1, Shveısarııa hokkeıshilerine 5:0 esebimen ese jibergen bolatyn. Tek alǵashqy týrda ǵana Norvegııa oıynshylaryn býllıt serııasynda tize búktirip (4:3), bıylǵy dúnıejúzilik dodanyń shaǵyn sensasııasyn tirkegen edi.
Alaıda keıingi oıyndarda Ǵalym Mámbetalıev shákirtteri qatarynan eki týrda azýly qarsylastarynan iri eseppen jeńilse de, bas bapker burynǵydaı muzaıdyndaǵy barlyq oıynshyǵa senim bildirdi. Tek Kanadamen ótken oıynda jańa qaqpashyny synap kórýge bel býyp, alǵashqy úsh týrda 13 shaıba ótkizip alǵan Andreı Shýtovtyń ornyna birinshi mınýttan bastap Nıkıta Boıarkındi shyǵardy. Degenmen «Barystyń» qaqpashysy bul matchta óz qaqpasyna bes shaıba ótkizip aldy.
Úıeńki japyraqtar eliniń ókilderi á degennen matchty belsendi bastap, oıyndaǵy alǵashqy shabýylyn golǵa aınaldyrdy. Kezdesýdiń 19-sekýndynda Makkenzı Ýıgar alystan dál soqqy jasap, Boıarkındi qapy qaldyrdy. Arada bes mınýt ótkende Loýson Kraýz eki márte mergendik tanytyp, Kanada quramasyna aıqyn basymdyq syılady – 3:0. Birinshi kezeńniń 10-mınýtynda Qazaqstan quramasy sapynan qorǵaýshy Ádil Beketaev gol soǵyp, esep aıyrmasyn qysqartqan edi, biraq kezeń sońyna deıin kanadalyqtar esepti 4:1-ge jetkizdi. Shaıbanyń avtory – Djo Veleno.
Úzilisten keıin bizdiń hokkeıshiler qorǵanysta da, shabýylda da qarsylastarynyń ataq-dańqynan qaımyqpaı, senimdi oınaı bastaǵan-dy. Birneshe ret qarsylas qaqpasynyń mańaıynda qaýipti shabýyl uıymdastyryp, kanadalyq qorǵaýshylardy biraz ábigerge saldy. Biraq jerlesterimiz óz degenine jete almady. Úshinshi kezeńde Soltústik Amerıka qurlyǵynyń ókilderi taǵy bir shaıba soǵyp, oıynnyń núktesin qoıdy – 5:1. Bul joly Samýel Bleız óz atyn tabloǵa jazdyrtty.
Bizdiń jigitter álem chempıonatyndaǵy kelesi oıynyn búgin týrnır kestesinde besinshi orynda turǵan Slovakııa hokkeıshilerimen ótkizedi.
