Ashylý saltanaty Qazaqstannyń ár óńirindegi 96 kitaphanadan kelgen qyzmetkerlerdi quttyqtaýdan bastaldy. Ashat Oralov is-shara qonaqtaryn Mádenıet jáne óner qyzmetkerleri kúnimen quttyqtap, «Mádenıet salasynyń úzdigi» tósbelgisin ıelengen kitaphanashylar men sala ardagerlerin marapattady. Sondaı-aq birqatar kitaphanaǵa alǵys hat tabystady.
Ashyq aspan astynda qazaqstandyq baspalardyń kitaptaryn satyp alýǵa bolatyn dúken, fotoaımaq, balalar pavılony men til, mádenıet, ádebıet jáne kitaphana isin damytý máselelerin talqylaýǵa arnalǵan sahna ornatyldy. Jýrnalıster, redaktorlar jáne kınorejısserlerdiń qatysýymen kitap kórmesi, netvorkıng jáne sheberlik sabaqtary ótti. Uıymdastyrýshylar men qonaqtar zııatkerlik is-sharany Astana men elimizdiń basqa da óńirlerinen zııaly qaýym ókilderin, oqytýshylar men mádenıet qyzmetkerlerin jınaǵan shaǵyn merekege aınaldyrdy. Sondaı-aq festıvalge sheteldik qonaqtar - Halyqaralyq Túrki akademııasynyń prezıdenti Shahın Mustafaev, Fransııa, Iran jáne basqa da memleketter elshilikteriniń ókilderi qatysty.
«Jas urpaqty tárbıeleýde jáne qalyptastyrýda osy salada jumys isteıtin qyzmetkerlerdiń eńbegi mańyzdy ról atqarady. Olardyń qatysýynsyz bul jumysty elestetý múmkin emes. Qazirgi ýaqytta Qazaqstanda 11 myńǵa jýyq kitaphanashy jumys isteıdi. Qazir kitaphana qyzmetkerleriniń mártebesin kóterý jáne olardyń eńbekaqysyn arttyrý boıynsha jumys júrgizip jatyrmyz», dedi Ashat Oralov.
Ashylý saltanatynan keıin mınıstr festıvalge kelgen kitaphanashylarmen sóılesip, Ulttyq akademııalyq kitaphana ǵımaratyndaǵy shaǵyn sýret kórmesin aralady. Ashat Oralov is-sharanyń erekshe formatyna qaramastan, bári joǵary deńgeıde uıymdastyrylǵanyn atap ótti.
