Aıta keteıik, 2023 jyldyń 28 naýryzynan bastap kásiporyn sý qysymyn retteý sharalaryn engizýge jáne ony bosatý kestesin belgileýge májbúr boldy.
Degenmen, jeke sektorlarda sýarý maýsymy bastaldy, tıisinshe bul aýyzsýdyń kóptep paıdalanylýyna alyp keledi. Osyǵan baılanysty, turǵyndardyń bir bóligi ótken demalys kúnderi sýmen qamtamasyz etýde belgili bir deńgeıde shekteýlerdi sezindi.
Osyǵan baılanysty mekeme jeke sektordyń barlyq turǵynynan sýdy tek qatań belgilengen ýaqytta, ıaǵnı 23:00-den 06:00-ge deıin sýarý úshin paıdalanýdy suraıdy. Eger bul yńǵaısyz bolsa, tehnıkalyq sýdy tómendegi mekenjaılardan satyp alýǵa bolady:
1. KTS, Qorǵaljyn tas joly, 47;
2. Jansúgirov, 7;
3.Ál-Farabı, 18K;
«Sonymen qatar, belgilengen kestege qaramastan, qalanyń kóptegen úılerinde sý qysymy qalypty jaǵdaıǵa sáıkes keledi jáne tek keıbir turǵyn úı keshenderi ǵana tómen rejımde ekeni baıqaldy. Mundaı jaǵdaıda biz qyzmet kórsetetin kompanııaǵa habarlasyp, ońtaıly qysymdy ornatý úshin sorǵylardy qaıta baptaýǵa tyrysýlaryńyzdy suraımyz.
Osy jaǵdaıdy eskere otyryp, ásirese demalys kúnderi santehnıkalyq júıege júktemeni azaıtý úshin jumys kúnderi turmystyq jumystardy josparlaýdy usynamyz.
Mańyzdysy, bul ýaqytsha sharalar jańa sorǵy-súzgi stansııasy (SSS) iske qosylǵanǵa deıin qoldanylady. Aýyz sý stansııasynyń qurylysy 2021 jyldyń kúzinde bastaldy jáne onyń qýaty táýligine 105 myń tekshe metr sýdy quraıdy», delingen habarlamada.
Bul búkil qala úshin sýmen jabdyqtaýdy edáýir arttyrýǵa, sol arqyly qalany sýmen jabdyqtaý máselesin tolyǵymen sheshýge múmkindik beredi. Osy jyldyń jazynda jańa SSS qurylysyn aıaqtaý josparlanyp otyr.
