Keshe álem birinshiliginiń toptyq kezeńdegi oıyndary óz máresine jetip, týrnırdiń pleı-off kezeńine shyqqan jáne birinshi dıvızıonǵa túsip qalǵan quramalar belgili boldy. Jer-jahannyń eń úzdik 16 quramasy jınalǵan dúnıejúzilik dodada jerlesterimiz jeti oıynnyń úsheýinde jeńiske jetip, qatarynan tórtinshi jyl joǵary topta oınaý múmkindigin saqtap qaldy. Buǵan deıin bizdiń jigitter tek 2004 (Kanada) jáne 2005 (Chehııa) jyldary uıymdastyrylǵan álem chempıonattarynda qatarynan eki jyl turaqty óner kórsetken bolatyn. Sonymen qatar otandastarymyz 1998, 2004, 2005, 2006, 2010, 2012, 2014, 2016, 2021 jáne 2022 jyldary da joǵary topta júldelerge talasyp kórgen-di. Biraq ázirge jerlesterimiz bul mejeni baǵyndyra almaı keledi. Qazaqstan quramasynyń 1998 jyldan bergi álem chempıonattaryndaǵy eń úzdik nátıjesi – 5-oryn. Bul jetistikke otandastarymyz 2021 jyly Rıgadaǵy dodada qol jetkizgen edi.
Bıylǵy álem chempıonatynda Qazaqstan quramasy ár jyldary «qazaqylandyrylǵan» kanadalyq, amerıkalyq jáne reseılik legıonerlerdiń kómeginen bas tartyp, tek qana jergilikti hokkeıshilerge senim artty. Otandyq hokkeıshilerden jasaqtalǵan ulttyq qurama Rıga tórindegi oıyndarda sátti óner kórsetip, jankúıerlerdiń senimin aqtaı bildi.
Jerlesterimiz álem birinshiliginiń tusaýkeser básekesinde Norvegııa quramasyn býllıt serııasynda jeńip, chempıonatty jap-jaqsy bastaǵanymen, keıingi úsh oıynda Chehııa (5:1), Shveısarııa (5:0) jáne Kanada (5:1) hokkeıshileriniń aldynda dármensizdik tanytyp, jeńilip qaldy. Al besinshi týrda Slovakııa quramasyn býllıtte 4:3 esebimen tize búktirip, altynshy týrda Latvııaǵa ese jiberdi – 7:0. Toptyq kezeńniń sońǵy týrynda Slovenııa hokkeıshilerimen sheberlik baıqasyp, tamasha kambek jasady – 4:3. Osylaısha, Qazaqstan ulttyq quramasy álem chempıonatyndaǵy jeti oıynnyń úsheýinde jeńiske jetip, úsh retinde de qarsylastaryn birdeı eseppen qapy qaldyrdy.
Toptyq kezeńniń oıyndary máresine jetken soń ulttyq quramanyń bas bapkeri Ǵalym Mámbetalıev álem chempıonatyn qorytyndylap, birinshilik týraly óz oıyn ortaǵa saldy. «Ár jeńilisten keıin qatelikterimizden sabaq alyp, oıynymyzdy jaqsartyp otyrýǵa tyrystyq. Birinshi kezdesýde jeńiske jetip, keıingi matchtarda qarsylastarymyzǵa jol berip qoıǵanymyz óte ókinishti. Biraq oıyndy kórgen jankúıerler sol básekelerde jigitterimizdiń jeńiske degen jigerin anyq baıqaǵan bolýy kerek. О́zderińiz bilesizder, biz bul chempıonatta tek ózimizdiń jergilikti hokkeıshilerimizben ǵana oınap shyqtyq. Kóp oıynshymyz birinshi ret álem chempıonatyna qatysqan soń azdaǵan qobaljý boldy. Sondaı-aq birazyna halyqaralyq oıyndardaǵy tájirıbe jetispedi. Dese de jigitter az ýaqyttyń ishinde jaqsy ujym qalyptastyryp, muzaıdynda bir-biri úshin, Qazaqstan úshin janyn berip oınady», dedi Ǵ.Mámbetalıev.
Toptyq kezeńdegi ózge de oıyndarǵa toqtalar bolsaq, «V» tobynda Shveısarııa, Chehııa jáne Kanada quramalary sońǵy týr oıyndarynyń nátıjesine qaramaı-aq, týrnırdiń pleı-off kezeńine joldama aldy. Al tórtinshi joldamany jarys qojaıyny Latvııa men Slovakııa quramalary sarapqa saldy. Keshe Latvııa týrnır kestesiniń kóshbasshysy Shveısarııa quramasymen, Slovakııa Norvegııa hokkeıshilerimen kezdesti.
«A» tobynan AQSh, Shvesııa jáne byltyrǵy jeńimpaz – Fınlıandııa hokkeıshileri merziminen buryn pleı-off joldamasyn ıelendi. Bul toptyń sońǵy joldamasyna keshe Germanııa men Danııa hokkeıshileri talas júrgizdi. Phenchhan Olımpıadasynyń kúmis júldegeri atanǵan Germanııa sońǵy týrda Fransııamen sheberlik baıqassa, Danııa hokkeıshileri Fınlıandııadan upaı alýǵa tyrysyp kórdi. Al alǵashqy oıynynda Fransııany overtaımda tize búktirip, keıin taǵy bir upaı oljalaǵan Majarstan birinshi dıvızıonǵa túsip qaldy.
Shaıbaly hokkeıden 2024 jylǵy álem chempıonaty 10-26 mamyr aralyǵynda Chehııanyń Praga jáne Ostrova qalalarynda ótedi.
