Zań kómegi kimderge arnalǵan?

Dóńgelek ústelge Májilis depýtattary, Ádilet, Ishki ister, Sıfrlyq damý, ınnovasııalar jáne aeroǵarysh ónerkásibi mınıstrlikteriniń, Bas prokýratýra jáne UQK ókilderi, Respýblıkalyq advokattar alqasynyń tóraǵasy, zań konsýltanttary palatalary qaýymdastyqtarynyń, Respýblıkalyq notarıattyq palatanyń, respýblıkalyq jeke sot oryndaýshylary palatasynyń, memlekettik organdar men uıymdardyń ókilderi men halyqaralyq sarapshylar qatysty.

Is-shara basynda mamandar zań kómegin kórsetý salasyn jetildirý jáne ony avtomattandyrý boıynsha jumysty jalǵastyrý máse­lelerin talqylady. Jıyn­dy Zańnama jáne sot-quqyq­tyq reforma komıtetiniń tóraǵasy Snejanna Imasheva ashyp, Ádilet mınıstri Azamat Esqaraev kirispe sóz sóıledi. Memleket basshysy azamattardyń quqyqtary men bostandyqtaryn qorǵaý maqsatynda zań qyzmetterin kórsetýge erekshe nazar aýdarýdy tapsyrǵanyn atap ótken mınıstr: «Zań kómegin kórsetý salasyndaǵy ózekti máselelerdi talqylaý bo­ıynsha kóshpeli keńes ótkizý  ýaqtyly jáne ózekti. Búgingi otyrys barysynda aıtyl­ǵan usynystardy iske asyrý jónindegi naqty sharalar komıtettiń usynymdaryn­da kórsetiletin bolady. Keleshekte biz olardy osy saladaǵy zańnamany jetildirý jónindegi jumys sheńberinde eskeremiz», dedi.

Búgingi tańda respýblıka bo­ıynsha 5 891 advokat jáne 13 010 zań keńesshisi zań kóme­gin kórsetýde. «2022 jyl­ǵy 20 maýsymnan bastap «Advo­kattyq qyzmet jáne zań kó­megi týraly» zańǵa tegin zań kó­megine kepildik berilgen adam­dar tobyn keńeıtetin ózgeris­ter engizildi. Endi az qam­tylǵan jáne kópbalaly otbasylar, turmystyq zorlyq-zombylyq qurbandary, azaptaý qurbandary, 1 jáne 2-sanattaǵy múgedekter, zeınetkerler tegin kómek ala alady», dedi Ádilet vıse-mınıstri Bekbolat Moldabekov.

Ádilet vıse-mınıstriniń aıtýynsha, osy ózgeristerden keıin memleket kepildigi arqa­synda zań kómegin alǵan azamattar sany artqan. Mysaly, 2021 jyly zań turǵysyndaǵy kómek 122 337 azamatqa berilse, 2022 jyly 169 495 azamatqa kórsetildi.

Degenmen, vıse-mınıstr elimizdiń keıbir óńirlerinde memleket tarapynan berilgen kepildik týraly kóp adam esti­megenin, ıaǵnı halyqqa tú­sindirý jumystary kemshin bolyp jatqanyn atap ótti. «Bul rette jekelegen sýbektilerden quqyqtyq aqparat alý jáne zań kómegin alý quqyǵy boıynsha suraqtar týyndaıdy. Atap aıtqanda, Aqmola oblysynda bar bolǵany 846 azamatqa zańgerlik keńes berilse, salystyrmaly túrde osyndaı halyq sany bar Batys Qazaqstan oblysynda 3 myńnan astam azamatqa zańgerlik keńes berilgen. Ákimshilik ister boıynsha da jaǵdaı osyndaı, Shymkentte bar bolǵany 120 azamatqa kómek kórsetilse, (2023 jyly – 3), Almatyda 1 800-ge jýyq azamat (2023 jyly – 519) kómek alǵan. Osyǵan baılanys­ty quqyq qorǵaý ján­e memlekettik organdar, advo­kattar alqalary men sot organ­daryna halyq arasynda zań kó­megin alý múmkindigi týraly tú­sindirý jumystaryn kúsheı­tý qajet dep sanaımyz», dedi ol.

Otyrysta qatysýshylar zań kómegin kórsetý júıesin odan ári jetildirý, «E-zań kómegi» aqparattyq júıesin damytý, sondaı-aq depýtattardyń usynymdarynda kórsetiletin advo­kattar men zań konsýl­tant­taryna saǵattyq mól­sher­leme boıynsha ýaqytty yq­shamdaý jolymen zań kómegin kór­setkeni úshin tólemdi ulǵaıtý máselesi boıynsha túzetýler engizý jóninde usynystar aıtty.