– Atyraý oblysyndaǵy kezekti issapar siz úshin nesimen erekshelendi? Kelgen naýqastardyń basym shaǵymdary qandaı boldy?
– Atyraýdaǵy issapardyń ereksheligi - bir kúnde 46 naýqasty dárigerlik keńeske qabyldap úlgerdim. Aldyma kelgenderdiń basym kópshiligi ınsýlt kótergen kisiler, jaryǵy (gryja) bar naýqastar. Sondaı-aq parkınson jáne epılepsııamen aýyratyn naýqastar da boldy. Olardy Medısınalyq ortalyq aýrýhanasyndaǵy bilikti mamandarǵa baǵyttap, qolymnan kelgen kómekti barynsha berýge tyrystym.
– О́ńirdegi áriptestermen tájirıbe almasý barysynda eki tarap úshin jańashyldyqtar oryn aldy ma?
– Iá, issapar barysynda atyraýlyq áriptester mı qantamyrlarynyń tarylýy boıynsha bizben birge alǵash ret operasııa jasady. Olarǵa operasııa kezindegi tehnıkalyq kemshilikterdi kórsettik. О́ńirdegi dárigerler naýqastarǵa ota jasaý men em júrgizýdegi tyń ádisterdi úırendi.
– QR Prezıdenti Is basqarmasynyń Medısınalyq ortalyǵy jáne Atyraý oblysy ákimdigi arasynda ózara yntymaqtastyq týraly Memorandýmǵa qol qoıylady ǵoı, bul Memorandým negizinde qandaı nátıjelerge qol jetkizýge bolady?
– Memorandým negizinde Atyraý oblysynyń aýrýhanalarymen seriktes retinde birge jumystar atqaratyn bolamyz. Naýqastarǵa qatysty kúrdeli jaǵdaılarda kásibı keńes berip, tipti jergilikti jerde operasııa jasaýǵa múmkindikter artady dep otyrmyz. Sonymen qatar óńirdiń jas mamandaryna bizdiń tarapymyzdan ádistemelik qoldaý kórsetiledi.
– Buǵan deıin barǵan 4 óńirdi qosqanda barlyǵy qansha operasııa jasap, qansha dárigerlik keńes júrgizdińiz?
– «Qazaqstan Respýblıkasy Prezıdenti Is Basqarmasy Medısınalyq ortalyǵynyń kúnderi» jobasy aıasynda Aqmola, Shymkent, Aqtóbe, ShQO arnaıy issapar baǵdarlamasymen boldyq. Barlyq óńir boıynsha esebin júrgizsem, 100-den asa naýqasqa konsýltasııa júrgizip, 20-dan asa operasııa jasaǵan ekenmin. Onyń ishinde basym bóligi kúrdeli operasııalar boldy.
