Rasynda Vasıa ondaı qurmetke laıyq. Sporttyq mansabyn Balqash qalasynda áıgili bapker Aleksandr Apachınskııdiń qol astynda bastaǵan jerlesimiz ýaqyt oza óz dáýiriniń eń myqty boksshylarynyń biri ári biregeıine aınaldy. Áýesqoı rıngte ol jastar arasynda KSRO jáne Eýropa chempıony atandy. Eresekter dýyna qosylǵannan keıin de Jırovtyń jeńisti joly jalǵasty. Áýeli ol TMD birinshiliginde top jaryp, Azııa oıyndarynda úshinshi orynǵa taban tiredi. Azııa chempıonatynda altyn men kúmis medalderdi enshiledi.1993 jáne 1995 jyldardaǵy álem chempıonattarynda qola medaldi qorjynǵa saldy. 1996 jyly Atlantada alaýy tutanǵan Olımpııada oıyndarynda bas júldeni oljalap qana qoımaı, eń úzdik boksshyǵa tıesili Vel Barker kýbogin de tóbesine kóterdi.
Atlantadaǵy doda aıaqtalǵannan keıin Vasılıı Jırov kásipqoı rıngte kúsh synasty. 1997-2009 jyldar aralyǵynda 42 márte sharshy alańǵa shyqqan ol 38 ret jeńis toıyn toılady. 32 qarsylasyn nokaýtqa jiberdi. 1999 jyldyń 5 maýsymynda AQSh-tyń Mıssısıpı shtatyndaǵy Bıloskı qalasynda «Balqashtyń barysy» IBF nusqasy boıynsha birinshi aýyr salmaqtyń chempıondyq belbeýi úshin talasyp, jergilikti boksshy Artýr Ýılıamsty jetinshi raýndta uryp jyqty. Sodan keıin ol nebir dúleı kúsh ıelerin esinen tandyryp, óz ataǵyn alty márte sátti qorǵady.
2001 jyldyń 6 aqpanynda Vasıa óziniń kezekti kezdesýin Alataý baýraıynda ótkizdi. Sol kezde Almatydaǵy Balýan Sholaq atyndaǵy sport saraıynda ıneshanshar oryn bolmady. Elimizdiń ár aımaǵynan kelgen jankúıerler Qazaqstannyń kásipqoı boks tarıhyndaǵy tuńǵysh álem chempıonyna barynsha qoldaý kórsetti. Jırov el senimin aqtady. Pýerto-Rıkodan kelgen Aleks Gonsalesti sol qolymen ıektiń astynan uryp, birinshi raýndta-aq sulatyp salǵany esimizde.
2003 jyly Jırov alǵash ret jeńilistiń kermek dámin tatty. Ol AQSh-tyń alyby Djeıms Toýnıden upaı sanymen utylyp, altyn belbeýden aıyryldy. Sol jyldyń kúzinde ýgandalyq Djozef Kıvanýkıdi qapy qaldyrǵannan keıin Vasılıı aýyr salmaqqa aýysýdy jón kórdi. Bul onyń qateligi boldy. Alyptarmen toǵyz ret aıqasqan ol alty ret jeńiske jetse, úsh jekpe-jekte san soǵyp qaldy. Atap aıtsaq, jerlesimiz Djo Mesı men Maıkl Mýrerge ese jiberip, Orlın Norrıspen teń tústi. Bir aıta keterligi, Mýrerden ol nokaýtpen jeńildi. О́ziniń sońǵy kezdesýin Jırov 2009 jyldyń 17 qazanynda Djonatan Ýılıamske qarsy ótkizip, bul básekede aıqyn basymdyq tanytty. Sodan keıin jerlesimiz bylǵary qolǵabyn shegege ildi.
Vasılıı Jırov elimizdiń ǵana emes, álemdik boks tarıhynda da aıtarlyqtaı iz qaldyrǵany anyq. Ol – Qazaqstannan shyqqan tuńǵysh Olımpıada chempıony, Barker kýboginiń ıegeri jáne kásipqoı bokstan alǵashqy álem chempıony. Sondyqtan da «Balqash barysynyń» esimi jekpe-jek óneriniń «Dańq zaly» men álemdik sport tarıhynda altyn áriptermen jazylýǵa ábden laıyq.
