Irgetasy 1988 jyly qalanǵan «Errea Sport» brendimen byltyr ÝEFA kelisimshartqa otyryp, ulttyq quramalardyń jańa jeıdesin daıyndaýǵa ýaǵdalasqan edi. Sol kelisim aıasynda atalǵan kompanııa búginge deıin Kıpr, Belarýs, Lıýksembýrg, Lıhtenshteın, Malta, Andorra, Farer araldary jáne San-Marıno sııaqty ulttyq quramalarǵa jańa jeıde daıyndap bergen bolatyn.
QFF men ÝEFA ulttyq quramalardyń jańa fýtbol jeıdesin daıyndaý men qamtamasyz etý jónindegi kelisim boıynsha endi «Errea Sport» Qazaqstan ulttyq quramasynyń jańa seriktesi atanyp otyr. Buǵan deıin bizdiń ulttyq qurama fýtbolshylary jasyl alańda «Adidas» brendi usynǵan jeıdemen óner kórsetip kelgen-di.
Bir aıta keterligi, buǵan deıin Qazaqstan fýtbol federasııasy jeıde jetkizýmen aınalysatyn sporttyq uıymdardyń tek ózderi usynǵan ónimin ǵana paıdalanyp kelgen bolsa, «Errea Sport» kompanııasyna ulttyq quramanyń jańa jeıdesiniń dızaınyn daıyndaýda otandyq «Creon» kompanııasy kómektesip, jeıdeniń qazaqy naqyshta jasalýyna septigin tıgizgen. Iаǵnı jeıde motıvterinen qazaqy oıý-órnekterdi kezdestirýge bolady. «Errea Sport» kompanııasy ulttyq quramaǵa úsh oıyn jeıdesin usyndy. Olar: úıdegi (sary tús), qonaqtaǵy (kók) jáne qosymsha (qara).
Qazaqstan ulttyq quramasy jańa jeıdemen alǵashqy oıyndaryn maýsym aıynda San-Marıno jáne Soltústik Irlandııamen ótkizedi.
