World Scholar's Cup akademııalyq olımpıadasy bolashaq ǵalymdar men kóshbasshylardyń jahandyq qaýymdastyǵy bolyp sanalady. Búginge deıin ózekti máseleler men ıdeıalardy talqylaý úshin álemniń ár túkpirinen oqýshylardyń basyn biriktirip, olarǵa jańa qyrlaryn ashýǵa, alǵan bilimin is júzinde qoldana bilýge jáne ózderiniń kóshbasshylyq qasıetin shyńdaýǵa jol ashýda. Mekteptiń aǵylshyn tili muǵalimi A.Serǵalıeva jáne A.Qýanyshqalıevanyń jetekshiligimen aǵa lıgaǵa attanǵan zııatkerler Team Challenge, Debate Champions, Team Bowl, Writing Champions, Challengesubjects, Team Debate, Team Writing, Championscholars sanattary boıynsha altyn jáne kúmis medaldarǵa ıe boldy. Onyń ishinde 9-synyp oqýshysy Dana Qojanııaz barlyq sanat boıynsha eń joǵary upaı alyp, School Top Scholars nomınasııasymen marapattaldy. Nátıjesinde oqýshylardyń ozyq oılary men qarym-qabileti joǵary baǵalanyp, halyqaralyq kezeńge joldama aldy.
Qatysýshylar komandalyq debat, birlesken shyǵarmashylyq jumys, komandalyq suraq-jaýap jáne test boıynsha synǵa tústi. Shet elderge shaqyrtý alyp shabyttanǵan shákirtter aldaǵy ýaqytta mektep bedelin álemdik deńgeıde bıiktetkisi keledi.
Batys Qazaqstan oblysy
