«Búgin – Saıası qýǵyn-súrgin jáne asharshylyq qurbandaryn eske alý kúni. Bul – tarıhtan taǵylym alatyn jáne babalar rýhyna taǵzym etetin mańyzdy data. Shyn máninde, halqymyzdyń basynan ótken qasiretti kezeńderdi ult jadynan óshirmeý aıryqsha mánge ıe. Sol arqyly tarıhı sanamyzdy jańǵyrtyp, ulttyq biregeıligimizdi nyǵaıtamyz. Bul kún Táýelsizdiktiń qadirin túsiný úshin de asa qajet.
Sondyqtan Memleket basshysy Qasym-Jomart Kemeluly Toqaev osy máselege únemi basa mán berip keledi. Prezıdentimizdiń tapsyrmasy boıynsha Saıası qýǵyn-súrgin qurbandaryn tolyq aqtaý jónindegi memlekettik komıssııa qurylǵany belgili. Júıeli jumystyń arqasynda buryn qupııa bolyp kelgen kóptegen arhıv materıalyna qoljetimdilik qamtamasyz etildi. Bul rette Senattyń qoldaýymen jaryq kórgen alapat Asharshylyqqa qatysty jeti tomdyq qujattar jınaǵyn da atap ótken jón», dep jazdy M.Áshimbaev.
Budan soń ol ótken aptada osy ataýly kúnge oraı «QarLag» mýzeıine arnaıy baryp, jazyqsyz jala jabylǵandardyń rýhyna taǵzym etkenin jazǵan.
«Ult úshin ómirin qurban etken arystarymyzdyń esimderin ulyqtaý, qate saıasattyń saldarynan opat bolǵandardyń sońynan duǵa baǵyshtaý – barshamyzdyń perzenttik jáne azamattyq boryshymyz. Sol sebepti búgingi býyn men keler urpaq úshin bul kúnniń máni tereń, mańyzy zor bolyp qala bereri sózsiz. Endi eshqashan qazaq dalasynda mundaı qasiret bolmasyn! Árdaıym elimiz aman, jurtymyz tynysh bolsyn!», delingen jazbada.
