Sondaı-aq 6 úzdik zııatker QS reıtıngi boıynsha eń úzdik joǵary oqý oryndary sanalatyn Massachýsets jáne Kalıfornııa tehnologııalyq ınstıtýttary, Aıvı lıgasynyń Kolýmbııa, Braýn, Pensılvanııa ýnıversıtteri men Dartmýt kolledjinde bilim ala alady.
Elimizdegi 21 NIS pen Astanadaǵy Halyqaralyq mektep bıyl sońǵy qońyraý saltanatyn erekshe atap ótip jatyr.
Aıta ketsek, bıyl «Nazarbaev Zııatkerlik mektepteri» derbes bilim berý uıymyna 15 jyl tolyp otyr. Búgingi aıtýly kún aıasynda NIS Basqarma tóraǵasy Ánýar Janǵozın úlken ómirge qadam basqaly turǵan shákirtterge sáttilik tilep, jastarǵa qundy keńes berdi.
«Búgin bizdiń túlekter úshin erekshe kún. Birneshe jyl buryn Zııatkerlik mektepterdiń tabaldyryǵyn attaǵan balalar eseıip, jańa ómirge qadam basqaly tur. Qymbatty túlekter, sizderge ómirdegi úlken jeńisterdi tileımin. Al oǵan jetý úshin, birinshiden, kez kelgen jańalyqqa ashyq bolyńyzdar. Qoǵam sońǵy ınnovasııalardy ıgergen mamandardy qajet etedi. Ekinshiden, óz kúshterińizge árdaıym senimdi bolyńyzdar. Jas memleketimiz ózderińizdeı jastarǵa zor senim artyp otyr. Búgingi tańda elimiz buryn-sońdy bolmaǵan múmkindikterdi jasap, naqty maqsattarǵa jetýge jol ashyp otyr», dedi Ánýar Janǵozın.
Taǵy bir jaǵymdy jańalyq, bıyl 12-shi synypty bitirgen 64 túlek QS reıtıngi boıynsha álemdegi TOP-100 úzdik ýnıversıtetter qataryna engen University of Toronto, University of British Columbia, Johns Hopkins University, CityU, PolyU sekildi joǵary oqý oryndarynda bilimin jalǵastyra alady.
Sondaı-aq NIS túlekterine otandyq joǵary oqý oryndary Qozybaev ýnıversıteti men QBTÝ Arızona ýnıversıtetiniń qosarlanǵan dıplomy aıasynda bilim alýǵa múmkindik berip otyr, KIMEP pen Astana IT da zııatker jastardy joǵary bilim alýǵa shaqyrǵan.
