Jeńimpazdarǵa – 100 myń dollar

Atap aıtqanda, 1-14 mamyr kúnderi О́zbekstan astanasynda uıymdastyrylǵan erler ara­syn­daǵy álem chempıonatynda Kók Týymyzdy kókte jelbiretip, Tash­kent tórinde Ánuranymyzdy shyr­qatqan Sanjar Táshkenbaı (48 kg), Mah­mud Sabyrhan (54 kg), Aslanbek Shymbergenov (71 kg) jáne Nurbek Oralbaıǵa (80 kg) Keńes Raqyshev jarys aldynda ózi ýáde etkendeı 100 myń AQSh dollaryn tabystasa, kúmis júldeger atanǵan Dýlat Bekbaýovqa (67 kg) 50 myń AQSh dollary kóleminde syıaqy berdi. Sonymen qatar Ke­ńes Raqyshev Dýlatqa shveısarııalyq saǵatty da syıǵa tartty.

Al naýryz aıynda Nıý-Delı­de ótken álem birinshiliginde el qor­jynyna kúmis júlde salǵan Ka­rına Ibragımova men Lázzat Kún­geı­baeva 30 myń, qola júlde­gerler – Alýa Balqybekova, Va­len­tına Halzova jáne Farıza Shol­taı 10 myń AQSh dollary kó­lemindegi qarjylaı syıaqyǵa ıe boldy.

Boks federasııasynyń pre­zıdenti bul kúni boksshylardyń baı­raqty básekede jeńiske je­týine zor úlesin qosyp júrgen ko­manda ókilderi – bapkerlik qu­ram, keńesshiler, keshendi ǵyly­mı top múshelerin de nazardan tys qaldyrǵan joq. Shtattaǵy jattyq­tyrýshylar, jeke bapkerler, dárigerler, massaj jasaýshylar jáne basqa da mamandar 1 myńnan 15 myń AQSh dollary kóleminde syıaqy aldy.

«Álem chempıonaty kezinde bizge qyzý qoldaý kórsetken el jan­kúıerlerine taǵy da erekshe alǵys aıtamyn. Federasııa, komanda úshin bul – úlken mártebe. Biz árqashan senimdi aqtaýǵa tyrysamyz. Qazir elimizdiń boks quramasy álemdik boks reıtınginde kósh bas­tap tur. Memleket basshysy Qasym-Jomart Toqaev chempıon­da­rymyzdy alǵashqylardyń biri bolyp quttyqtady. Elge oral­ǵannan keıin boksshylardy Aqor­dada qabyldap, marapattady. Bul eńbegimizdiń elengenin, baǵalanǵanyn bildiredi. Búgingi is-sharamyz erekshe ekenin aıtyp óteıin. О́ıtkeni biz sportshylar men bapkerlerdi ǵana emes, alǵashqy ret chempıondarymyzdyń analaryn da marapattap otyrmyz. Budan bylaı bul dástúrge enedi dep oılaımyn. Alyp anadan týa­dy, sondyqtan aq jaýlyqty analarymyzǵa úlken alǵys aıtamyn», dedi Keńes Raqyshev óziniń quttyqtaý sózinde.

Elimizdiń birneshe qalasynan arnaıy kelgen chempıondardyń analaryna Keńes Raqyshev gúl shoǵy men 2 mıllıon teńgeniń sertıfıkatyn syılady. Al О́zbekstan astanasyndaǵy álem chempıonatynda tamasha nátıje kórsetkeni úshin erler quramasynyń bas jat­tyqtyrýshysy Myrzaǵalı Aıt­janovqa 25 myń AQSh dollarymen qosa temir tulpar tartý etti.