Jıyrma kúnge jalǵasqan jarys qorytyndysy boıynsha, jalpykomandalyq esepte 44 altyn, 15 kúmis jáne 10 qola medal oljalaǵan Qaraǵandy oblysynyń sportshylary ekinshi ret úzdik shyqty. Ekinshi oryndy 35 altyn, 9 kúmis jáne 9 qola medal jeńip alǵan Atyraý oblysynyń ókilderi ıelense, úzdik úshtikti 24 altyn, 16 kúmis jáne 6 qola medalmen Aqtóbe oblysy túıindedi.
Paralımpııa oıyndary – tórt jylda bir ret ótetin elimizdegi eń mańyzdy sporttyq is-shara. Onyń basty maqsaty – dene múmkindikteri shekteýli tulǵalar arasynda salamatty ómir saltyn nasıhattaý, elimizde paralımpıadalyq sport túrlerin damytý jáne úzdik óner kórsetken sportshylardy ulttyq qurama sapyna irikteý. Bıyl Paralımpıada jarystaryna elimizdiń barlyq óńirinen ártúrli jastaǵy sportshylar qatysty. Olardyń arasynda eń jas sportshy 16 jasta bolsa, eń úlkeni 78 jasta. Qatysýshylardyń aracynda 2016 jylǵy Rıo Paralımpıadasynyń jeńimpazy Zýlfııa Gabıdýllına, 2020 jylǵy Tokıo Paralımpıadasynyń chempıony Davıd Degtıarev, júldegerler – Ánýar Sarıev pen Nurdaýlet Jumaǵalı, para dzıýdodan álem chempıondary Aqmaral Naýatbek, Erǵalı Shameı, basqa da iri halyqaralyq jarystardyń jeńimpazdary da boldy.
Bıylǵy oıyndar barysynda para jeńil atletıka (247 sportshy), para ústel tennısi (157 sportshy) jáne para júzý (124 sportshy) sport túrlerinen eń kóp sportshy qatysqanyn erekshe atap ótken jón. Osy jarys aıasynda alǵash ret elimizde T-64 sanaty boıynsha protezben júgirýden jarys uıymdastyryldy. Sonymen qatar bıylǵy Paralımpııa oıyndarynda elimizdiń 9 rekordy jańartyldy.
Sondaı-aq osy jarystarda úzdik óner kórsetken sportshylar ulttyq qurama sapyna qabyldanyp, alda kele jatqan Hanchjoý-2022 IV Para Azııa oıyndary men XVII jazǵy Paralımpııa oıyndarynyń irikteý jarystaryna qatysýǵa múmkindik aldy.
«Bıylǵy Paralımpııa oıyndary men úshin óte qyzyqty ótti. Myqty sportshylardyń arasynda óz kúshimdi synap kórýge múmkindik bergen uıymdastyrýshylarǵa alǵysym sheksiz. Para ústel tennısinen ótken S4 sanatyndaǵy saıysta elimizdiń eń myqty tennısshilerinen basym túsip, jarys jeńimpazy atandym», dep aǵynan jaryldy para ústel tennısinen ulttyq qurama sportshysy Meıirbek О́tepov.
