Eskek esý sporty 1900 jyldan beri Olımpııa oıyndarynyń ajyramas bir bóligine aınalyp úlgerdi. Parıjde bul sport túrin unatatyn jankúıerler sportshylardyń tartysty saıystaryn ǵana emes, sonymen qatar joǵaryda aıtyp ótkenimizdeı, osy sport túrine arnaıy salynyp jatqan Ver-sıýr-Marne sport kesheniniń keremet kórinisin de baıqaı alady. 2024 jylǵy Olımpııa oıyndaryndaǵy eskek esý jarysynyń taǵy bir ereksheligi – Olımpıada tarıhynda ekinshi ret erler men áıelder arasyndaǵy saıystar birdeı jaǵdaıda ótpek.
Parıjde qansha eskekshi óner kórsetedi?
Uıymdastyrýshylar áýelgi jospary boıynsha Parıjdegi Olımpııa oıyndarynda 502 sportshy túrli-tústi júldelerdi sarapqa salady. Iаǵnı erlerden – 251, áıelderden de 251 sportshy baq synaıdy. Degenmen Tokıodaǵy Olımpıadaǵa qaraǵanda Parıjdegi dodada sportshylar sany 24-ke deıin azaıǵan. Tokıoda 526 sportshy baq synaǵan edi. Sonymen qatar alty joldama jarys qojaıyndary retinde Fransııa sportshylaryna beriledi.
Al qalǵan 496 sportshy (248 er jáne 248 áıel) jeti saıys boıynsha joldamalardy ózara sarapqa salady. Iаǵnı 58 sportshy (ár jynys boıynsha 29 joldama) jekeleı synda, 52 sportshy (ár jynysqa 26 joldama) – juptyq, 52 sportshy (ár jynysqa 26 joldama) – ekilik juptyq, 72 sportshy (ár jynysqa 36 joldama) – tórttik juptyq, 72 sportshy (ár jynysqa 36 joldama) – juptasqan tórttik, 126 sportshy (ár jynysqa 63 joldama) – segizdik jup jáne 64 sportshy (ár jynysqa 32 joldama) ekilik jupta joldamalarǵa ıelik etedi.
Joldamalar qalaı taratylady?
Halyqaralyq eskek esý federasııasy (FISA) akademııalyq eskek esýshilerge Parıj Olımpıadasyna joldama jeńip alý úshin tómendegideı úsh múmkindik beredi.
Birinshisi: akademııalyq eskek esý boıynsha álem chempıonaty. 3-10 qyrkúıek kúnderi Serbııada ótetin álem chempıonatynda 336 joldama (ár jynysqa 168 joldamadan) sarapqa salynady. Bul saıysqa HOK quramyna enetin barlyq ulttyq Olımpıada komıtetteri, Halyqaralyq eskek esý federasııasynyń (FISA) quramyna engen federasııalardyń ókilderi qatysa alady. Al Olımpıada joldamasy tek joǵary oryndardan kóringen sportshylarǵa ǵana buıyrady.
Ekinshi: aımaqtyq irikteýler. Iаǵnı álem chempıonatynda sátsiz óner kórsetip, joldamadan qaǵylǵan nemese álem birinshiligine qatysa almaǵan ulttyq quramalar aımaqtyq irikteý jarystarynda olımpıadalyq kvotany ıelenip kórýge tyrysady. Ekinshi múmkindikte Azııa jáne Muhıt aımaǵy, Afrıka, Amerıka jáne Eýropa memleketiniń ókilderi 64 joldamany (ár jynysqa 32 kvotadan) óz qurlyqtarynyń irikteý saıystary arqyly sarapqa salady.
Úshinshi: olımpıadalyq irikteý. Aldyńǵy eki irikteý saıystarynda joldama ala almaǵan sportshylarǵa HOK taǵy bir múmkindik berip, 2024 jyldyń mamyr aıynda Shveısarııanyń Lıýsern qalasyndaǵy olımpıadalyq irikteýde sońǵy 96 joldamany (ár jynysqa 48 joldama) taratady.
Osylaısha, Olımpııa oıyndaryna qatysatyn 502 sportshy irikteledi. Al Parıj Olımpıadasyndaǵy akademııalyq eskek esý saıystary 2024 jyldyń 26 shilde men 11 tamyz aralyǵynda ótedi.
