Úzdikter upaıdan shashaý shyǵarǵan joq

12-týrdyń shymyldyǵyn «Qaırat» pen «Oqjetpes» klýb­tary ashyp berdi. О́tken týr­da chempıonat aýtsaıderi «Maq­ta­araldan» syrt alańda 3:1 ese­bimen jeńilgen «Qaırat» bul týrda Kókshetaýdyń «Oqjetpesin» qabyldap, 2:1 esebimen jeńiske jetti. Almatynyń «Ortalyq» stadıonda ótken básekeniń taǵdyryn «Qaırattyń» brazılııalyq sha­býyl­shysy Joao Paýlonyń jeke sheberligi sheship ketti. Oıynnyń segizinshi mınýtynda ol penaltıden gol soǵyp, komandasyn alǵa shyǵarsa, 49-mınýtta esepti ese­leı tústi. Al arada 30 mınýt ótkende qonaqtar sapynan Rýs­lan Bolov 11 metrlik aıyp dobyn sátti oryndap, esep aıyrma­syn qysqartty. Qatarynan eki oıynda jeńilip, úshinshi matchta úsh upaıdy enshilegen «Qaırat» týr­nır kestesinde besinshi ornyn saqtap qaldy.

Byltyr el chempıony atanǵan «Astananyń» bıylǵy qarqyny ázirge kóńil qýantarlyqtaı emes. Kelesi aıda Chempıondar lıga­synyń irikteý kezeńine qatysatyn komanda keıingi bes týr boıy qarsylastaryn tek bir dop aıyrmasymen ǵana jeńýge shamalary jetip júr. Bul týrda olar Pavlodardyń «Aq­sýy­nan» 1:0 esebimen basym tústi. Oıyn­daǵy jalǵyz goldy – Marın Tomasov soqty.

Týrnır kestesinde «Astanany» ókshelep kele jatqan «Aqtóbe» klýby 12-týrda jankúıerlerine qos qýanysh syılady. Birinshisi, jóndeý jumystaryna baılanysty biraz ýaqytqa jabylǵan Qobylandy batyr atyndaǵy ortalyq stadıonda «Aqtóbe» fýtbolshylary 2023 jylǵy alǵashqy oıynyn ótkizse, ekinshisi – sol match­ta Andreı Karpovıch shákirtteri Qaraǵandydan kelgen «Shahter» klýbyn 2:0 esebimen tize búktirdi. Oıyn­nyń altynshy mınýtynda Arman Keńesov «Aqtóbeni» esep­te alǵa shyǵarsa, 71-mınýttta Lýka Gadranı jan­kúıer­lerdi shat­tyqqa bóledi. Bul jeńisten keıin «Aqtóbe» týrnır kestesinde «Qy­zyljardy» bir saty tómen yǵys­tyryp, úshinshi orynǵa kóterildi.

Keıingi bes týrda birde-bir oıyn­da upaıdan shashaý shy­ǵarmaǵan Shymkenttiń «Ordabasy» klýby bul týrda da úsh upaıyn esh­kimge bergen joq. Atyraýdyń «Aty­raý» klýbyn qabyldaǵan jer­gilikti ujym 2:1 esebimen je­ń­iske jetti. Birinshi taımda Bobýr Abdýholıkov (25-mınýt) pen Sergeı Malyıdyń (30) soqqan goldary «Ordabasyǵa» jeńis syı­lady. Qonaqtar sapynan ekin­shi taımda Ngýngýsı Effıong mer­gendik tanytty.

Al týrdyń ortalyq oıy­ny sanalǵan «Tobyl» men «Qy­­zyl­jar» arasyndaǵy matchta alań ıeleri basymdyq tanytty. Qos­tanaıda ótken tartysty match­tyń taǵdyryn oıynnyń 75-mınýtynda «Tobyldyń» shabýylshysy Serj Deble sheshti – 1:0. Mańyzdy úsh upaıyn qorjynǵa salǵan qos­tanaılyq ujym 20 upaımen altynshy orynǵa kóterilip aldy.

12-týrda kóshbasshylar soq­paǵan goldy týrnır kestesiniń ekinshi jartysynda kele jatqan koman­dalar soǵyp, jankúıerlerdi bir serpiltip tastady. Taldy­qor­ǵanda ótken «Jetisý» men «Kas­­pıı» arasyndaǵy matchta jan­kúıerler bes goldyń kýási boldy. Birinshi taımda 2:1 esebimen alda turǵan aqtaýlyq ujym ekinshi taımda qaqpasyna eki gol ótkizip alyp, qolda turǵan úsh upaıynan aıyrylyp qaldy. Oıyndaǵy jeńis golyn ekinshi taımda «Jetisýdyń» serbııalyq shabýylshysy Iovan Stoıanovıch soqty – 3:2.

Sondaı-aq týrnır kestesinde sońǵy orynda kele jatqan «Maqta­aral» Qyzylordaǵa qonaqqa baryp, jergilikti «Qaısar» klýbyn 10 oıynshymen júrip 2:0 esebimen tize búktirdi. Goldyń avtor­lary – Ramazan Kárimov (42-mınýt) pen Seký Dýmbııa (97). Osylaısha, bas bapkerlik qyz­metke Qaırat Nur­dáýletov kel­geli beri qatarynan ekinshi oıynda jeńiske jetken «Maqtaaral» 9 upaı­­men týrnır kestesinde 11-orynǵa kóterildi.

Endi el birinshiliginiń oıyndary Eýropa chempıonatynyń irikteý matchtaryna baılanysty ýaqytsha toqtatylyp, 24 maýsymda qaıta jalǵasady.