At dúbirine bólengen kún

Dúbirli dodanyń ashylý saltanatyna Astana qalasynyń Ult­tyq jáne olımpıadalyq at sporty túrleri federasııasynyń pre­zıdenti Erlan Qanalımov, Qazaq ulttyq sport túrleri qaýym­das­ty­ǵynyń prezıdenti Islambek Sal­janov, Astana qalasy ákiminiń orynbasary Eset Baıken qatysyp, shabandozdarǵa sáttilik tiledi.

«Barshańyzdy el tarıhyndaǵy aıtýly merekeniń biri – Mem­lekettik rámizder kúnimen quttyq­taımyn! Árdaıym el ishi merekeli de berekeli, eltańbamyz – eńseli, týymyz – tuǵyrly, ánuranymyz aıbyndy bolsyn deımin. Jylqy dese júgen ala júgiretin qazaq úshin alaman báıgeniń alar orny erekshe ekeni aıtpasa da túsinikti. Ulttyq sport – ult rýhynyń jarshysy. Onyń damýy­na qyzmet etý barshamyzdyń min­detimiz», dedi Astana qalasy ákiminiń orynbasary Eset Baıken.

Elorda ákimdiginiń qol­daýy­men Astana qalasynyń Ult­tyq jáne olım­pıadalyq at sporty túr­leri federasııasynyń uıym­das­tyrýymen ótken báıgede shabandozdar «Qunan», «Jorǵa», «Top» jáne «Alaman» túrlerinen synǵa tústi. Báıgeniń jalpy júlde qory 20 000 000 teńgeni qu­rady.

Jarys qorytyndysy boıyn­sha, qunan báıge (7 shaqyrym) sa­ıysynda ShQO ókili Sultan Tórehan bas júldemen qatar 2 mln teńgege ıe bolsa, jorǵa jarysynda (7 shaqyrym) elordalyq Shýak Jaılaýbekov (2 mln teńge) márege birinshi jetti. Al top báı­gede (12 shaqyrym) Almaty oblysynyń ókili Bekzat Dildáhan (2 mln 200 myń teńge), alaman báıgede (18 shaqyrym) elordalyq Abdykal Aslanbek (4 mln teńge) jeńimpaz atandy.