Bul máseleni belgili jýrnalıst Arnur Asqar «Egemen Qazaqstan» gazetine jazǵan «Astana ekonomıkasy: Taq kelgen jerge baq keldi me?» maqalasynda kótergen.
О́tken jyldyń qańtar-qarasha aılarynda elordanyń syrtqy taýar aınalymynyń kólemi 9 526 mln AQSh dollarynan asyp tústi. Atap aıtqanda, eksport kólemi 7,005.4 mln dollar bolsa, ımporttyń úlesi 2,521,2 mıllıon dollarǵa teń. Ekonomısterdiń málimetine súıensek, qala Tórtinshi ónerkásiptik revolıýsııa jaǵdaıynda el ekonomıkasyn jańǵyrtýǵa, Qazaqstannyń jahandyq ekonomıkalyq keńistigine kirigýine zor yqpalyn tıgizip otyr.
Qala ákimdigi usynǵan derekterge súıensek, 25 jyl ishinde qalaǵa quıylǵan ınvestısııa kólemi 55 ese ósken. Byltyrǵy jyldyń qorytyndysy boıynsha negizgi kapıtalǵa 1 mlrd 446 mln teńgeden asyp túsipti.
Maqala avtorynyń aıtýynsha, sheteldik kompanııalardyń qatysýymen qalada 7 iri ınvestısııalyq joba júzege asyryldy. Olardyń qatarynda transformator shyǵaratyn fransııalyq Alstom kompanııasy, medısınalyq jabdyqtar shyǵaratyn «Eira Med» kompanııasy syndy alpaýyttar bar. «Ábý-Dabı Plaza» kópmaqsatty kesheniniń qurylysyna Birikken Arab Ámirlikteriniń, avtokólikterge arnalǵan logıstıkalyq termınal qurylysyna Japonııanyń kompanııasy atsalysqanyn atap ótken durys.
Halyqtyń sany jyl saıyn artyp kele jatqandyqtan, Astana - sheteldik kapıtal úshin tartymdy qalalardyń biri. Bul rette ǵylymı áleýettiń aýqymdy bóligi elordada shoǵyrlanǵanyn aıta ketken oryndy. Buǵan qaladaǵy 15 joǵary oqý orny men 33 kolledj dálel bola alady. Orta mektepterdiń sany da 160-tan asady jáne bul kórsetkish jyl sanap artyp keledi.
