Taldyqorǵanda ótken is-sharaǵa ońtústik óńiriniń, onyń ishinde Almaty, Jambyl, Qyzylorda, Túrkistan oblystarynyń ókilderi qatysty. Aýqymdy jumystyń qorytyndysy osy jyldyń qarasha aıynda Astanada barlyq oblystan kelgen delegasııalardyń qatysýymen ótetin Aýyl áıelderiniń VI respýblıkalyq forýmy bolmaqshy.
Forým pandemııadan keıin bıyl alǵash ret offlaın formatta ótkizildi. Elimiz boıynsha barlyq múddeli tarap onlaın baılanyspen qamtamasyz etildi. Oblystar ákimderiniń orynbasarlary, sondaı-aq Aýyl sharýashylyǵy, Eńbek jáne halyqty áleýmettik qorǵaý, Ulttyq ekonomıka mınıstrlikteriniń, qoǵamdyq jáne halyqaralyq uıymdardyń ókilderi isker áıeldermen tikeleı baılanysqa shyqty. «Forýmdy uıymdastyrýdaǵy maqsat – jeke qosalqy sharýashylyqtar men aýyl sharýashylyǵy kooperatıvterin damytý, aýyl sharýashylyǵyn qoldaýǵa baǵyttalǵan memlekettik baǵdarlamalardy ázirleý, jergilikti ózin-ózi basqarý quraldaryn damytý, bıznestiń áleýmettik jaýapkershiligin arttyrý, 2030 jylǵa deıin jergilikti deńgeıde turaqty damý maqsattaryna qol jetkizý máselelerin talqylaý. Forýmǵa qatysýshylar «Coca-Cola Belesteri» jobasynyń Bıznes negizderi, «Farmer school» men Kooperasııanyń fermerlik daǵdylardy damytý boıynsha trenıngterine qatysty. Alda osyndaı forýmdardy batys, shyǵys, soltústik jáne ortalyq óńirlerde ótkizý josparlanyp otyr», dedi Qazaqstannyń aýyl áıelderi forýmyn uıymdastyrý komıtetiniń tóraǵasy, Qazaqstan Respýblıkasy Parlamenti Májilisiniń IV, V, VI shaqyrylymdarynyń depýtaty Maıra Aısına.
Aýyl áıelderi forýmynyń tarıhy 2018 jyly Astana qalasynda ótken I Respýblıkalyq forýmnan bastalady. Forým 2019 jyldan bastap Qazaqstannyń ár aımaǵynda ótkizile bastady. 2020 jyldan beri barlyq oblysta onlaın rejimde ótedi.
Qazaqstannyń aýyl áıelderi forýmyn uıymdastyrýshylar – «Jasyl ekonomıkany qoldaý jáne G-Global-dy damytý koalısııasy» ZTB jáne «Áleýmettik dınamıka» qoǵamdyq qory. Oǵan Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa, oblys ákimdikteri jáne «Atameken» UKP qoldaý kórsetti.
